સ્થાનિક સ્વરાજ્યની ચૂંટણીના પરિણામો બાદ જિલ્લા સંગઠને પછાડ્યો ધોકો 

ભુજ - કચ્છઉદય : કચ્છ જિલ્લા કોંગ્રેસ સમિતિના પ્રમુખ વી.કે. હુંબલ દ્વારા પક્ષના શિસ્તભંગ બદલ કડક કાર્યવાહી કરવામાં આવી છે. સ્થાનિક સ્વરાજ્યની ચૂંટણીના પરિણામો જાહેર થયા બાદ હવે ચૂંટણી દરમિયાન પક્ષ વિરોધી પ્રવૃત્તિ કરનાર પાર્ટી કાર્યકર્તાઓ અને હોદ્દેદારો પર ગાજ વરસી છે. પક્ષના સત્તાવાર ઉમેદવારોને નુકસાન પહોંચાડવા અને પક્ષવિરોધી પ્રવૃત્તિઓમાં સંડોવાયેલા હોવાના ગંભીર કારણોસર જિલ્લાના ૧૫ જેટલા કાર્યકરો અને આગેવાનોને કોંગ્રેસના પ્રાથમિક સભ્યપદેથી આગામી છ વર્ષ માટે સસ્પેન્ડ કરવાનો નિર્ણય લેવામાં આવ્યો છે. આ યાદીમાં યોગેશ પોકાર, કિરણબેન પોકાર, દશરથસિંહ ખગોરત, ઇકબાલ હાજીઅબ્દુલા મંધરા, આમદ હુશેન સંઘાર, રમજાન હારુન નોડે (નલિયા), ઈશા આમદ કેર (ભદ્રુવાંઢ), નવીન અબચુંગ, હાજીઅબ્દુલ હાજીહુશેન સંઘાર, અસલમ લુહાર, ઓસમાણ ભચુ નોતિયાર (નલિયા), જુસબશા ઈસ્માઈલશા સૈયદ (મોથાળા), જુમાબેન મહેશ્વરી, શોકત હુશેન સુમરા (કોઠારા) અને લોધરા આદમ મુસાનો સમાવેશ થાય છે. પક્ષના આ આકરા નિર્ણયથી સ્થાનિક રાજકારણમાં ભારે ગરમાવો જોવા મળી રહ્યો છે.

------------