ગુજરાતની એલસીસી પ્રોજેક્ટ્સનો રૂા. ૪૨૭ કરોડના કામોમાંથી કચ્છ કેનાલ - સિંચાઈના કામો થશે
ગુજરાત સ્થિત ઇન્ફ્રાસ્ટ્રક્ચર અને પાણી વ્યવસ્થાપન ક્ષેત્રની જાણીતી કંપની એલસીસી પ્રોજેક્ટ્સ લિમિટેડનો પ્રથમ જાહેર શેર ઇશ્યૂ (આઈપીઓ) ૯ સપ્ટેમ્બરથી ખુલશે
ભુજ - કચ્છઉદય : ગુજરાત સ્થિત ઇન્ફ્રાસ્ટ્રક્ચર અને પાણી વ્યવસ્થાપન ક્ષેત્રની જાણીતી કંપની એલસીસી પ્રોજેક્ટ્સ લિમિટેડનો પ્રથમ જાહેર શેર ઇશ્યૂ (આઈપીઓ) ૯ સપ્ટેમ્બરથી ખુલવા જઈ રહ્યો છે. કંપનીએ આઈપીઓ મારફતે રૂ.૪૨૭ કરોડ એકત્ર કરવાનો લક્ષ્યાંક રાખ્યો છે. આઈપીઓ માટે પ્રતિ શેર રૂ.૧૩૯થી રૂ.૧૪૬નો ભાવ પટ્ટો નક્કી કરવામાં આવ્યો છે. ઈશ્યૂ ૧૧ સપ્ટેમ્બરે બંધ થવાનો છે. કંપનીની મુખ્ય કામગીરી પાણી અને સિંચાઈ ક્ષેત્ર સાથે સંકળાયેલી છે. કંપની ડેમ, બેરેજ, વીયર, કેનાલ, પાઇપલાઇન, પાણી પુરવઠા યોજના તથા વોટર ટ્રીટમેન્ટ સહિતના વિવિધ પ્રોજેક્ટ્સમાં કામગીરી કરે છે. કંપનીની કુલ આવકમાં પાણી ક્ષેત્રનો મોટો હિસ્સો છે, જ્યારે માઇનિંગ, મેટ્રો, રેલવે અને ગ્રીન એનર્જી જેવા ક્ષેત્રોમાં પણ કંપની પોતાની કામગીરી ધરાવે છે.આઈપીઓની રકમનો ઉપયોગ દેવું ઘટાડવામાંઆઈપીઓમાં રૂ.૨૫૮ કરોડનો નવો શેર ઇશ્યૂ સામેલ છે, જ્યારે બાકીનો હિસ્સો ઓફર ફોર સેલનો છે. નવા ઇશ્યૂમાંથી મળનારી રકમનો મોટો હિસ્સો કંપનીના બાકી દેવાની ચુકવણી અથવા પૂર્વચુકવણી માટે ઉપયોગમાં લેવાની યોજના છે. આ ઉપરાંત કંપની સાધનો અને મશીનરીમાં પણ રોકાણ કરવાની છે. દેવું ઘટાડવાથી કંપનીની નાણાકીય સ્થિતિ વધુ મજબૂત બનવાની આશા વ્યક્ત કરવામાં આવી રહી છે.કંપની આગામી સમયમાં ડેટા સેન્ટરો અને ન્યુક્લિયર પાવર પ્લાન્ટ જેવા પાણીની વધુ જરૂરિયાત ધરાવતા ક્ષેત્રોમાં ઊભી થતી તકોને ધ્યાનમાં રાખીને પોતાની ક્ષમતા વધારવા પર ધ્યાન કેન્દ્રિત કરી રહી છે. છેલ્લા ૨૫ વર્ષથી પાણી વ્યવસ્થાપન ક્ષેત્રે કાર્યરત કંપની બદલાતી જીવનશૈલી, વધતી વસ્તી અને ઔદ્યોગિક વિકાસને કારણે પાણીની વધતી માંગને લાંબા ગાળાની મોટી તક તરીકે જોઈ રહી છે.
...........
કચ્છ સાથે એલસીસીનું મહત્વનું જોડાણ
એલસીસી પ્રોજેક્ટ્સની કામગીરીમાં કચ્છનું પણ મહત્વનું સ્થાન રહ્યું છે. કંપની દ્વારા કચ્છ બ્રાન્ચ કેનાલના લાંબા કેનાલ સાઇફન સહિતના મહત્વના સિંચાઈ પ્રોજેક્ટ્સ હાથ ધરવામાં આવ્યા છે. કચ્છ બ્રાન્ચ કેનાલ પ્રોજેક્ટ દરમિયાન નદીના ભાગમાં ઓછા સેફ બેરિંગ કેપેસિટી અને ડીવોટરિંગ જેવી પડકારજનક પરિસ્થિતિઓ વચ્ચે કામગીરી કરવામાં આવી હતી. કંપનીએ આ પ્રોજેક્ટને પોતાની મહત્વપૂર્ણ કામગીરીમાં સ્થાન આપ્યું છે. કચ્છના અંજાર અને ભુજ વિસ્તાર સાથે સંકળાયેલા દુધઈ સબ-બ્રાન્ચ કેનાલ પ્રોજેક્ટમાં પણ એલસીસી પ્રોજેક્ટ્સની કામગીરી રહી છે. કચ્છની દુષ્કાળ પરિસ્થિતિ તથા ભૂકંપ ઝોન-૫ને ધ્યાનમાં રાખીને અહીં એન્જિનિયરિંગ સોલ્યુશન સાથે કામગીરી કરવામાં આવી હતી. કચ્છમાં પાણી અને સિંચાઈની સુવિધા મજબૂત બનાવવાના દૃષ્ટિકોણથી આવા પ્રોજેક્ટ્સનું વિશેષ મહત્વ રહ્યું છે.
............
કંપનીના નેતૃત્વમાં કચ્છના અનુભવી ચહેરાઓ
કંપનીના પ્રમોટર તથા ચેરમેન - મેનેજિંગ ડિરેક્ટર એ.એસ. રબારીને સિવિલ એન્જિનિયરિંગ, ઇન્ફ્રાસ્ટ્રક્ચર ડેવલપમેન્ટ અને પ્રોજેક્ટ મેનેજમેન્ટ ક્ષેત્રે લાંબો અનુભવ છે. જ્યારે મેનેજિંગ ડિરેક્ટર લાલજીભાઈ અર્જુનભાઈ આહિર બિઝનેસ મેનેજમેન્ટ, વહીવટ, નાણાકીય અને ઓપરેશનલ કામગીરીનો અનુભવ ધરાવે છે. કંપનીના કચ્છમાં થયેલા પ્રોજેક્ટ્સ અને ભુજમાં સેવાકીય કામગીરીને કારણે એલસીસી પ્રોજેક્ટ્સનું કચ્છ સાથેનું જોડાણ નોંધપાત્ર રહ્યું છે.પાણી ક્ષેત્રની વધતી જરૂરિયાત કંપની માટે સારી તક તરીકે જોવાઈ રહ્યું છે.દેશમાં પાણી પુરવઠા, સિંચાઈ અને ઇન્ફ્રાસ્ટ્રક્ચર ક્ષેત્રે સરકારી તથા ખાનગી રોકાણ વધવાની સાથે એલસીસી પ્રોજેક્ટ્સ માટે પણ નવી તકો ઊભી થઈ રહી છે. કંપની હવે પાણી ક્ષેત્રની સાથે માઇનિંગ, મેટ્રો, રેલવે અને ગ્રીન એનર્જી જેવા ક્ષેત્રોમાં પણ પોતાની કામગીરી વિસ્તારવા તરફ આગળ વધી રહી છે. જોકે આઈપીઓમાં રોકાણ કરતા પહેલાં રોકાણકારોએ કંપનીના ઓફર દસ્તાવેજ, નાણાકીય પરિણામો, દેવું, ઓર્ડરબુક અને જોખમોની યોગ્ય તપાસ કરવી જરૂરી છે
.........
ભુજમાં સામાજિક સેવાકીય કામગીરી
એલસીસી સાથે સંકળાયેલા એલસીસી ફાઉન્ડેશન દ્વારા ભુજમાં આરોગ્ય, મેડિકલ કેમ્પ, શિક્ષણ અને અન્ય સામાજિક પ્રવૃત્તિઓ હાથ ધરવામાં આવતી હોવાનું કંપનીના દસ્તાવેજોમાં દર્શાવવામાં આવ્યું છે. ભુજમાં આરોગ્યલક્ષી કામગીરી સાથે સંકળાયેલા ટ્રસ્ટ મારફતે પણ વિવિધ સેવાકીય પ્રવૃત્તિઓ કરવામાં આવી હોવાનું કંપનીના અહેવાલોમાં જણાવાયું છે.
..........

Comments