Trending News
સ્થાનિક સમાચાર

ગાંધીધામ ખાતે તિરંગા યાત્રાના આયોજનને લઈને રૂટ નિરીક્ષણ કરીને સમીક્ષા કરતા કલેક્ટર

11 August




અનિલ રાણાવસિયાએ તિરંગા યાત્રાના સુચારૂ આયોજન અને નાગરિકોની સહભાગિતાને લઈને માર્ગદર્શન આપ્યું

ગાંધીધામ - કચ્છઉદય : સ્વાતંત્ર્ય પર્વની ઉજવણીના ભાગરૂપે ગાંધીધામ ખાતે તા. ૧૪ ઓગસ્ટના સવારે ૯ કલાકે જિલ્લા વહીવટીતંત્ર કચ્છ અને ગાંધીધામ મહાનગરપાલિકા દ્વારા સંયુક્તપણે ‘તિરંગા યાત્રા’નું આયોજન કરવામાં આવ્યું છે. આ યાત્રા પૂર્વે કચ્છ જિલ્લા કલેક્ટર અનિલ રાણાવસિયાએ તિરંગા યાત્રાના સમગ્ર રૂટની રૂબરૂ મુલાકાત લઈને ઝીણવટભર્યું નિરીક્ષણ કર્યું હતું. કલેક્ટરે મહાત્મા ગાંધી પ્રતિમા (ગાંધી માર્કેટ)થી શરૂ થઈ મુખ્ય બજાર, ભાઈપ્રતાપજી સર્કલ અને ત્યાંથી સરદાર વલ્લભભાઈ પટેલ પ્રતિમા થઈ ઝંડાચોક સુધીના રૂટની જાત મુલાકાત લઈને સમીક્ષા કરી હતી. 
તિરંગા કાર્યક્રમના સુચારું આયોજન અને સંકલન માટે કચ્છ કલેક્ટર અનિલ રાણાવસિયાએ માર્ગોની સફાઈ માટે અલાયદી ટીમ, ટ્રાફિક મેનેજમેન્ટ અને રૂટ ડાયવર્ઝન, સામાજિક સંસ્થાઓના સ્ટોલ અને સ્ટેજ, પીવાના પાણીની પર્યાપ્ત વ્યવસ્થા વગેરે બાબતોની સમીક્ષા કરીને માર્ગદર્શન આપ્યું હતું. કાયદો અને વ્યવસ્થાની જાળવણી અંગે કચ્છ કલેક્ટરે પૂર્વ કચ્છ પોલીસ અધિક્ષક સાગર બાગમાર સાથે વિસ્તૃત ચર્ચા કરીને આયોજનબદ્ધ રીતે કામગીરી કરવા જણાવ્યું હતું. તિરંગા યાત્રામાં ખાસ કરીને નાગરિકોને ઉત્સાહભેર જોડવા જણાવીને કલેક્ટરે ઉમેર્યું હતું કે, આ આયોજનમાં ગાંધીધામ અને કચ્છના તમામ નાગરિકો મોટી સંખ્યામાં અને હર્ષોલ્લાસ સાથે સહભાગી થાય તે માટે તંત્ર દ્વારા અપીલ કરવામાં આવી છે. 
આ તિરંગા યાત્રા કાર્યક્રમમાં નાગરિકો, બીએસએફ સહિત મિલિટ્રી અને પેરા મિલિટ્રી ફોર્સિસ, શાળાના વિદ્યાર્થીઓ, એન.સી.સી. કેડેટ્‌સ, પોલીસ જવાનો અને વિવિધ સમાજના લોકો ઉત્સાહભેર જોડાશે.  આ મુલાકાત દરમિયાન અંજાર પ્રાંત અધિકારી એસ.જે.ચૌધરી, નાયબ મ્યુનિસિપલ કમિશનર સંજયકુમાર રામાનુજ, ગાંધીધામ મામલતદાર જાવેદ સિંધી, યુવા વિકાસ અધિકારી દેવાંશી ગઢવી સહિત વિવિધ વિભાગોના અધિકારીઓ ઉપસ્થિત રહ્યા હતા. 
-----------

Comments

COMMENT / REPLY FROM