ભારે વરસાદ પહેલાં આશાપુરા સ્કૂલ ચોકડીનું અધૂરું કામ પૂર્ણ કરવા માંગ
ભુજ-કચ્છઉદય : મુન્દ્રા રોડ પર આશાપુરા સ્કૂલ નજીક આવેલી ચોકડી પાસે છેલ્લા ઘણા સમયથી પાઇપલાઇન સંબંધિત કામગીરી ચાલી રહી છે, પરંતુ હજુ સુધી કામ પૂર્ણ ન થતાં સ્થાનિક નાગરિકો અને વાહનચાલકોમાં રોષ અને ચિંતા જોવા મળી રહી છે. હાલમાં સ્થળ પર ખોદવામાં આવેલો મોટો ખાડો ખુલ્લો પડ્યો છે અને તસવીરો મુજબ માત્ર બે પાઇપોના જોડાણની કામગીરી બાકી હોવા છતાં કામ પૂર્ણ થતું ન હોવાનું ચર્ચાઈ રહ્યું છે.સ્થળ પર વચ્ચે લોખંડની પાઇપલાઇન પસાર થતી જોવા મળે છે, જે સંભવતઃ નર્મદા યોજનાની લાઇન હોવાનું માનવામાં આવે છે. તેના કારણે તકનીકી કારણોસર વિલંબ થતો હોઈ શકે છે, પરંતુ વરસાદી મોસમ શરૂ થવાની સાથે હવે આ અધૂરું કામ સ્થાનિકો માટે ચિંતાનો વિષય બન્યું છે. હવામાન વિભાગ દ્વારા આગામી દિવસોમાં કચ્છ સહિતના વિસ્તારોમાં ભારે વરસાદની આગાહી કરવામાં આવી છે. જો વરસાદ પહેલાં ખાડો પુરવામાં નહીં આવે તો વરસાદી પાણી ભરાઈ જવાના કારણે માર્ગની સ્થિતિ વધુ જોખમી બની શકે છે. ખાસ કરીને ટુ-વ્હીલર ચાલકો, શાળાએ જતા વિદ્યાર્થીઓ અને રોજિંદા અવરજવર કરતા લોકો માટે અકસ્માતનું જોખમ વધી શકે છે. વરસાદ દરમિયાન વાહનો સ્લીપ થવા, ખાડામાં ફસાવા અથવા અચાનક સંતુલન ગુમાવવાના બનાવો સર્જાઈ શકે તેવી ભીતિ વ્યક્ત કરવામાં આવી રહી છે.સ્થાનિક લોકોનું કહેવું છે કે જો બાકી રહેલા બે પાઇપોનું જોડાણ ઝડપથી પૂર્ણ કરી ખાડો પુરવામાં આવે અને ત્યારબાદ યોગ્ય રીતે સિમેન્ટીકરણ કરવામાં આવે તો વરસાદી મોસમમાં સર્જાઈ શકે તેવી મુશ્કેલીઓ અને અકસ્માતો અટકાવી શકાય. હાલ માર્ગ પર પસાર થતા વાહનચાલકોને ધીમે વાહન ચલાવવાની ફરજ પડી રહી છે, જેના કારણે ટ્રાફિકની સમસ્યા પણ ઉભી થાય છે. નગરજનો અને વેપારીઓએ સંબંધિત વિભાગ તેમજ તંત્રને તાત્કાલિક હસ્તક્ષેપ કરી વરસાદ પહેલાં આ કામગીરી પૂર્ણ કરાવવા અપીલ કરી છે. લોકોનું કહેવું છે કે જાહેર સુરક્ષાને ધ્યાનમાં રાખીને યુદ્ધના ધોરણે કામગીરી પૂર્ણ કરવામાં આવે તો સંભવિત અકસ્માતો અને જાનહાનિ જેવી પરિસ્થિતિઓ ટાળી શકાય.
----------

Comments