ભારતીય ડાયસ્પોરાએ કચ્છી લોકનૃત્ય રજૂ કરીને વડાપ્રધાન મોદીનું કર્યું ભાવભીનું સ્વાગત
સેશેલ્સના એરપોર્ટ પર ગુંજ્યા કચ્છી ઢોલના નાદ
વડાપ્રધાન નરેન્દ્ર મોદીએ સોશિયલ મીડિયા પર કચ્છની સંસ્કૃતિના કર્યા મુક્તકંઠે વખાણ : પૂર્વ આફ્રિકાના ટાપુ દેશમાં વસતા કચ્છીઓએ સાત સમંદર પાર પણ પોતાની ભવ્ય વિરાસત અને સંસ્કૃતિને જીવંત રાખતા કચ્છીમાડુઓમાં હરખની હેલી
ભુજ - કચ્છઉદય : કચ્છની ભાતીગળ સંસ્કૃતિ અને અનોખી પરંપરા માત્ર ભારત પૂરતી સીમિત નથી રહી, પરંતુ સાત સમંદર પાર પણ તેનો ડંકો વાગી રહ્યો છે, જેનો જીવંત પુરાવો તાજેતરમાં પૂર્વ આફ્રિકાના સુંદર ટાપુ દેશ સેશેલ્સમાં જોવા મળ્યો છે. સેશેલ્સના પોઈન્ટ લારુ એરપોર્ટ પર મહેમાનોના સ્વાગત માટે ભારતના અન્ય રાજ્યોની સાથે ખાસ કરીને આપણા સરહદી જિલ્લા કચ્છના પરંપરાગત લોકનૃત્યની ભવ્ય પ્રસ્તુતિ કરવામાં આવી હતી. આ અદ્ભુત સાંસ્કૃતિક સમન્વયથી અભિભૂત થઈને દેશના વડાપ્રધાન નરેન્દ્ર મોદીએ પોતાના સોશિયલ મીડિયા એકાઉન્ટ પર આ ક્ષણને બિરદાવી છે. વડાપ્રધાને આ વૈશ્વિક મંચ પર કચ્છી સંસ્કૃતિના થયેલા ભવ્ય પ્રદર્શન બદલ ગૌરવની લાગણી વ્યક્ત કરી છે.વડાપ્રધાન નરેન્દ્ર મોદીએ આ અદ્ભુત ક્ષણનો ઉલ્લેખ કરતા જણાવ્યું હતું કે, આ એક અતુલ્ય અને અભૂતપૂર્વ સાંસ્કૃતિક જોડાણ છે. સેશેલ્સના પોઈન્ટ લારુ એરપોર્ટ પર થયેલા સ્વાગતમાં ભારતના કચ્છ જિલ્લામાંથી આવેલા પરંપરાગત લોકનૃત્યનો સમાવેશ કરવામાં આવ્યો હતો, જે ખરેખર હૃદયસ્પર્શી છે. વડાપ્રધાને વિદેશમાં વસતા ભારતીય સમુદાયની પ્રશંસા કરતા ઉમેર્યું હતું કે, ભારતભરના વિવિધ ભાગોમાંથી ગયેલા આપણા ડાયસ્પોરાએ જે રીતે પોતાની મૂળ સંસ્કૃતિ અને પરંપરાઓને સાચવી રાખી છે અને તેને વૈશ્વિક સ્તરે સેલિબ્રેટ કરી રહ્યા છે, તે ખરેખર ખૂબ જ પ્રશંસનીય છે.કચ્છના વાચકો અને સમગ્ર કચ્છી સમુદાય માટે આ સમાચાર અત્યંત ગૌરવ અપાવનારા છે. આ ઘટના સાબિત કરે છે કે રોજીરોટી માટે કે અન્ય કારણોસર દાયકાઓ પહેલાં વિદેશમાં જઈને વસેલા કચ્છીઓએ પોતાની માતૃભૂમિના સંસ્કારો, સંગીત અને નૃત્યની ધરોહરને જરાય આંચ આવવા દીધી નથી. સેશેલ્સ જેવા આંતરરાષ્ટ્રીય સ્તરના એરપોર્ટ પર કચ્છી પહેરવેશ અને કચ્છી સંસ્કૃતિની ઝાંખી કરાવતું લોકનૃત્ય રજૂ થાય અને તેની સીધી નોંધ દેશના વડાપ્રધાન પોતે લે, તે સમગ્ર કચ્છી માડુઓ માટે એક ઐતિહાસિક અને હર્ષોલ્લાસની ક્ષણ છે. કચ્છી સંસ્કૃતિની આ વૈશ્વિક ગુંજ એ વાતની પ્રતીતિ કરાવે છે કે કચ્છી પ્રજા ભલે દુનિયાના કોઈપણ ખૂણે વસે, પણ તેમનું હૃદય હંમેશાં પોતાની માતૃભૂમિની સંસ્કૃતિ સાથે ધબકતું રહે છે.
---------------

Comments