Trending News
સ્થાનિક સમાચાર

અંજાર RTO કચેરીમાં બોગસ દસ્તાવેજો થી વાહન ટ્રાન્સફરના કૌભાંડ નો પર્દાફાશ

24 June


ટીટીઓ ફોર્મમાં ફોટા ચોંટાડી ફરીયાદીના નામે વાહન ટ્રાન્સફર કરાવવાની ફરીયાદ :

કથિત કાવતરાં બાબતે એજન્ટ સહિત બે સામે ગુનો નોંધાયો, એક આરોપી ઝડપાયો


અંજાર : પોલીસ મથકે આરટીઓ સંબંધિત દસ્તાવેજોમાં કથિત છેડછાડ અને કાવતરું કરીને વાહન ફરિયાદીના નામે ટ્રાન્સફર કરાવવાના આક્ષેપ અંગે ગુનો નોંધાયો છે. પોલીસ ફરિયાદ મુજબ, આરોપીઓએ ફરિયાદીની જાણ બહાર ટી.ટી.ઓ. ફોર્મમાં ફરિયાદીની તસવીર ચોંટાડી, કપટપૂર્વક તેનો ઉપયોગ કરી વાહન ટ્રાન્સફર કરાવ્યું હોવાનું સામે આવ્યું છે.પોલીસમાંથી પ્રાપ્ત વિગતો મુજબ, સિનુગરા ગામે જૂની વાસ વિસ્તારમાં રહેતા અને કલર કામ કરતા હનીફ અલીમામદ-કક્કલે ફરિયાદ નોંધાવી છે. ફરિયાદમાં (૧) રાજેશ આહીર, રહે. દબડા, અંજાર, (૨) આરટીઓ એજન્ટ રાહુલ રામજીભાઈ આહીર તેમજ (૩) તપાસમાં નીકળે તે તમામને આરોપી તરીકે દર્શાવવામાં આવ્યા છે.ફરિયાદ અનુસાર, આરોપી નં. ૧ અને આરોપી નં. ૨એ પરસ્પર મળતાવળ રાખી ફરિયાદીના સમાન ઇરાદે કાવતરું રચ્યું હતું. આ કાવતરાના ભાગરૂપે વાહન નંબર GJ-12-AT-9880  ફરિયાદીના નામે ટ્રાન્સફર કરાવવા માટે ટી.ટી.ઓ. ફોર્મમાં ફરિયાદીની તસવીર સહી કરી હોવાનું દર્શાવી કપટપૂર્વક દસ્તાવેજો તૈયાર કરવામાં આવ્યા હતા. બાદમાં આ દસ્તાવેજોના આધારે આરટીઓ, અંજાર ખાતે વાહન ફરિયાદીના નામે ટ્રાન્સફર કરાવી, ફરિયાદીની જાણ બહાર તેનો ઉપયોગ કરવામાં આવ્યો હોવાનો આક્ષેપ ફરિયાદમાં કરવામાં આવ્યો છે.આ બનાવ અંગે અંજાર પોલીસે ગુનો નોંધી આગળની તપાસ હાથ ધરી છે. પોલીસ નોંધ મુજબ આરોપી નં. ૨ ઝડપાઈ ગયો છે, જ્યારે આરોપી નં. ૧ હજુ સુધી પકડાયો નથી. સમગ્ર મામલે આગળ વધુ કોણ-કોણની સંડોવણી બહાર આવે છે તે તપાસનો વિષય બન્યો છે.


.........



ફરિયાદીની જાણ બહાર વાહન ટ્રાન્સફર થયું તો આરટીઓ તંત્ર આખરે શું ચેક કરતું હતું?


મોટર વાહન કાયદાની જોગવાઈ મુજબ વાહન માલિકી હસ્તાંતરણ માટે ફોર્મ-૨૯/૩૦, આર.સી., ઇન્શ્યોરન્સ, ઓળખ-સરનામાના દસ્તાવેજો અને સંબંધિત ચકાસણીના આધારે કાર્યવાહી થતી હોય છે. જો ફરિયાદ મુજબ ફરિયાદીની તસવીર ચોંટાડી, કપટપૂર્વક સહી-દસ્તાવેજો ઉભા કરી વાહન ટ્રાન્સફર થયું હોય, તો આ કેસમાં માત્ર આરોપીઓ જ નહીં પરંતુ આરટીઓની સ્ક્રુટિની, વેરિફિકેશન અને મંજૂરી પ્રક્રિયા પણ સવાલોના ઘેરામાં આવે છે.
ઉઠતા સવાલો : • ફરિયાદીની જાણ બહાર ટ્રાન્સફર થઈ ગયું તો આરટીઓએ અરજદાર/ટ્રાન્સફરીની ઓળખ કેવી રીતે ચકાસી? • ટી.ટી.ઓ./ટ્રાન્સફર ફોર્મ પર લગાવેલી તસવીર, સહી અને રજૂ કરાયેલા ઓળખ દસ્તાવેજોનું મિલાન કોણે કર્યું હતું? • ફોર્મ સ્વીકારતી વેળાએ મૂળ દસ્તાવેજો, ઓળખ પુરાવા અને સહીની પ્રાથમિક તપાસ થઈ હતી કે માત્ર કાગળો આગળ ધપાવી દેવામાં આવ્યા હતા? • જો ફરિયાદી કચેરીએ હાજર જ ન હતો, તો તેની સંમતિ અને હાજરી વિના ટ્રાન્સફર પ્રક્રિયા આગળ કેવી રીતે વધી? • ફાઈલ પર કયા કર્મચારી/અધિકારીએ ‘ઓકે’ આપી? ક્લાર્ક, એજન્ટ ચેનલ, સ્ક્રુટિની અધિકારી કે મંજૂરી આપનાર અધિકારી—જવાબદારી આખરે કોની? • આરટીઓ પાસે અરજદારોના ફોટા, સહી, આઈડી પ્રૂફ અને ફોર્મની ક્રોસ-વેરિફિકેશન માટે કોઈ મજબૂત સિસ્ટમ છે કે નહીં? હોય તો આ કેસમાં તે નિષ્ફળ કેમ ગઈ? • એજન્ટ મારફતે આવેલી ફાઈલોમાં વધારાની સતર્કતા રાખવામાં આવે છે કે ‘રૂટિન કામ’ માનીને ચકાસણી ઢીલી રાખવામાં આવે છે? • વાહન નંબર, જૂના માલિક, નવા માલિક અને રજૂ કરાયેલા દસ્તાવેજોમાં કોઈ ગડબડ દેખાઈ ન આવી? કે દેખાઈ હોવા છતાં અવગણાઈ? • ટ્રાન્સફર પહેલાં ફરિયાદીને કોઈ જીસ્જી, કોલ, નોટિસ કે ડિજિટલ એલર્ટ મોકલાયું હતું? જો નહીં, તો આવી સંવેદનશીલ પ્રક્રિયામાં સુરક્ષા વ્યવસ્થા ક્યાં છે? • જો નકલી/કપટપૂર્વકના દસ્તાવેજો પરથી ટ્રાન્સફર મંજૂર થયું હોય તો શું માત્ર આરોપીઓ સામે ગુનો પૂરતો છે કે આરટીઓની આંતરિક જવાબદારી પણ નક્કી થવી જોઈએ? • ફાઈલમાં નોંધાયેલ ફોટો, સહી, અરજી અને જોડાણોની ફોરેન્સિક/હેન્ડરાઇટિંગ તપાસ કરાવી આરટીઓની ભૂમિકા પણ ચકાસાશે કે નહીં? • આ સમગ્ર કિસ્સો ‘ફ્રોડ ટ્રાન્સફર’નો એકલો બનાવ છે કે અગાઉ પણ આવી રીતે એજન્ટ મારફતે ટ્રાન્સફર થયાની ફરિયાદો આવી છે?


........


જવાબદારી ક્યાં સુધી બને?

અંજાર : આવા કેસમાં જો પ્રાથમિક દસ્તાવેજી ચકાસણીમાં બેદરકારી, ઓળખની ખરાઈ કર્યા વગર ફાઈલ આગળ ધપાવવી, સહી-ફોટોનું મિલાન ન કરવું, અથવા શંકાસ્પદ દસ્તાવેજો છતાં ટ્રાન્સફર મંજૂર કરાયું હોય, તો આરટીઓ તંત્રની વહીવટી જવાબદારી, આંતરિક તપાસ અને વિભાગીય કાર્યવાહીનો પ્રશ્ન ઊભો થાય છે. કાયદેસર રીતે ટ્રાન્સફર માટે ફોર્મ-૨૯/૩૦ તથા જરૂરી દસ્તાવેજોના આધારે નોંધણી સત્તાધિકારીને સંતોષ થવો જરૂરી છે; ત્યારે આ કેસમાં “સંતોષ” કઈ રીતે નોંધાયો એ જ સૌથી મોટો સવાલ બની રહ્યો છે.


.....


 

Comments

COMMENT / REPLY FROM