કુનરિયા ગામે ‘સંકલિત ખાતર વ્યવસ્થાપન જાગૃતિ અભિયાન’ અંતર્ગત ખેડૂત તાલીમ કાર્યક્રમ યોજાયો
ભુજ - કચ્છઉદય : તાલુકાના કુનરિયા ગામે ‘સંકલિત ખાતર વ્યવસ્થાપન જાગૃતિ અભિયાન’ અંતર્ગત એક મહત્વપૂર્ણ ખેડૂત તાલીમ કાર્યક્રમનું આયોજન કરવામાં આવ્યું હતું. આ કાર્યક્રમમાં મોટી સંખ્યામાં સ્થાનિક ખેડૂતોએ હાજરી આપી આધુનિક ખેતી અને ખાતરના યોગ્ય વપરાશ અંગેનું માર્ગદર્શન મેળવ્યું હતું.
તાલીમ કાર્યક્રમ દરમિયાન કૃષિ ક્ષેત્રના નિષ્ણાતો દ્વારા ખેડૂતોને ઉપયોગી થાય તેવા વિવિધ વિષયો પર ઊંડાણપૂર્વક માહિતી આપવામાં આવી હતી, જેમાં જમીનની ફળદ્રુપતા જાળવી રાખવા માટે ખાતરનો યોગ્ય અને સંતુલિત ઉપયોગ કેવી રીતે કરવો તેની સમજણ આપવામાં આવી હતી. બજારમાં ઉપલબ્ધ યૂરિયા અને ડીએપીના અન્ય અસરકારક વિકલ્પો વિશે ખેડૂતોને માહિતગાર કરાયા, જેથી ખેતી ખર્ચમાં ઘટાડો કરી શકાય. કૃષિ પ્રગતિ એપના વિવિધ લાભો અને ખેડૂતો તેનો રોજિંદી ખેતીમાં કેવી રીતે ઉપયોગ કરી શકે તે અંગે માર્ગદર્શન અપાયું હતું. સરકારી યોજનાઓ અને સહાયનો સીધો લાભ મેળવવા માટે જરૂરી ખેડૂત નોંધણીની પ્રક્રિયા સરળ ભાષામાં સમજાવવામાં આવી હતી.
આ તાલીમ શિબિરમાં કૃષિ વિભાગ અને વિવિધ સંસ્થાઓના તજજ્ઞો કિમ્પલ દેત્રોજા (ગ્રામસેવક, કૃષિ વિભાગ), અંંકિત માડમ (ગ્રામસેવક, કૃષિ વિભાગ), હર્ષદીપસિંહ રાણા (ગ્રામસેવક, કૃષિ વિભાગ), હાર્દિક આદ્રોજા ડિસ્ટ્રિક્ટ ઓફિસર, ધરમસિંહ વાલા ડિસ્ટ્રિક્ટ લેવલ કોર્ડિનેટર, ડો. અવિનાશ બોચાલિયા ઉપસ્થિત રહ્યા હતા અને ખેડૂતોના પ્રશ્નોના ઉત્તરો આપ્યા હતા. કૃષિ નિષ્ણાતોએ ખેડૂતોને "આવો - શીખો - પ્રગતિ કરો" ના સૂત્ર સાથે સરકારી યોજનાઓનો મહત્તમ લાભ લેવા અને વૈજ્ઞાનિક ઢબે ખેતી કરવા અપીલ કરી હતી.
------------

Comments