ગૌમાતાને રાષ્ટ્રમાતા જાહેર કરવાની માંગ સાથે કચ્છમાં ૭ મેના આવેદન અપાશે
ગૌ માતાના સન્માન અને રક્ષણના ઉમદા હેતુ સાથે સમગ્ર ભારતમાં ગૌ સન્માન આહ્વાન અભિયાનનો પ્રારંભ કરવામાં આવ્યો છે. આ અભિયાનના ભાગરૂપે સંતોના માર્ગદર્શન હેઠળ આગામી ૭ મેના રોજ ગુજરાતના કચ્છ જિલ્લામાં આવેલી મામલતદાર કચેરી ખાતે એક વિશેષ પ્રાર્થના પત્ર સોંપવામાં આવશે. અગાઉ ૨૭ એપ્રિલના રોજ સમગ્ર દેશમાં ગૌ સન્માન દિવસની ભવ્ય ઉજવણી કરવામાં આવી હતી, જેમાં ભારતના અંદાજે ૫૦૦૦ જેટલા તાલુકાઓમાં આવેલી મામલતદાર કચેરીઓ દ્વારા રાષ્ટ્રપતિ, વડાપ્રધાન, રાજ્યપાલ અને મુખ્યમંત્રીઓને સંબોધીને પ્રાર્થના પત્ર પાઠવવામાં આવ્યા હતા.
આ અભિયાન અંતર્ગત અત્યારે વિવિધ શહેરો અને ગ્રામ્ય વિસ્તારોમાં હસ્તાક્ષર ઝુંબેશ પણ ચલાવવામાં આવી રહી છે, જેમાં લોકો બહોળી સંખ્યામાં જોડાઈને પોતાનું સમર્થન જાહેર કરી રહ્યા છે. મહિલા મંડળો પણ આ કાર્યમાં ઉત્સાહભેર ભાગ લઈ રહ્યા છે અને પોતાના હાથ પર મહેંદી મૂકીને ગૌ સન્માન અભિયાનને અનોખી રીતે ટેકો આપી રહ્યા છે. સનાતની સમાજના તમામ લોકોને આ હસ્તાક્ષર અભિયાનમાં સહયોગ આપવા માટે નમ્ર અપીલ કરવામાં આવી છે. ગૌ માતાની સેવા એ જ રાષ્ટ્રની સેવા છે તેવા મંત્ર સાથે શરૂ થયેલા આ અભિયાનનો મુખ્ય ઉદ્દેશ્ય ગૌ હત્યા પર સંપૂર્ણ પ્રતિબંધ મૂકવો અને ગૌ માતાને સત્તાવાર રીતે રાષ્ટ્રમાતા તરીકેનું ગૌરવ અપાવવાનો છે. ૭ મેના રોજ યોજાનારા આ કાર્યક્રમમાં કચ્છના નગરજનોને મોટી સંખ્યામાં હાજર રહેવા અનુરોધ કરવામાં આવ્યો છે.
----------

Comments