ધોળાવીરામાં ૧૦મીએ ૧૮ દેશના ૪૫ તથા ૭ રાજ્યના ૨૩ પતંગબાજો લડાવશે અવનવી પતંગના પેચ
ધોળાવીરા ખાતે આંતરરાષ્ટ્રીય પતંગ મહોત્સવના આયોજનને લઈને સમીક્ષા બેઠક યોજાઈ : કચ્છના વહીવટીતંત્ર દ્વારા આંતરરાષ્ટ્રીય કાઇટીસ્ટોના સ્વાગત માટે વિશેષ તૈયારીઓ
ભુજ - કચ્છઉદય : ધોળાવીરા ખાતે ૧૦ જાન્યુઆરી ૨૦૨૬ના રોજ પતંગ મહોત્સવનું આયોજન ગુજરાત પ્રવાસન નિગમ લિમિટેડ અને જિલ્લા વહીવટીતંત્ર કચ્છના સંયુક્ત ઉપક્રમે કરવામાં આવ્યું છે. આ કાર્યક્રમની તૈયારીઓની સમીક્ષા હેતુ ભુજ કલેક્ટર કચેરી ખાતે કલેક્ટર આનંદ પટેલના અધ્યક્ષસ્થાને સંબંધિત વિભાગના અધિકારીઓ સાથે બેઠક યોજાઇ હતી. ધોળાવીરા ખાતે યોજાનારા આંતરરાષ્ટ્રીય પતંગ મહોત્સવમાં ૧૮ દેશના ૪૫ તથા ૭ રાજ્યના ૨૩ પતંગબાજો માટે જરૂરી તમામ વ્યવસ્થાઓ અંગે કલેક્ટરે વિગતો મેળવીને અધિકારીઓને માર્ગદર્શન પુરૂ પાડ્યું હતું.
આ કાર્યક્રમને અનુરૂપ કાઇટીસ્ટો માટેના સ્ટોલ, સ્ટેજ તેમજ આનુષંગિક અન્ય વ્યવસ્થાઓના સુચારૂ આયોજન અંગે કલેક્ટર દ્વારા સૂચના આપવામાં આવી હતી. સમગ્ર કાર્યક્રમની રૂપરેખાની વિગતો મેળવીને કલેક્ટરે સાંસ્કૃતિક કાર્યક્રમની પ્રસ્તૃતિ, પતંગબાજોનું સન્માન, ફાયર બ્રિગેડ, મોબાઇલ ટોયલેટની સુવિધા, પાર્કિંગ વ્યવસ્થા, મેડીકલ ટીમ, પોલીસ વ્યવસ્થા, ટ્રાફિક નિયમન સહિતની સુવિધાઓ ઊભી કરવા જણાવ્યું હતુ.ં
આ બેઠકમાં નિવાસી અધિક કલેક્ટર ડી.પી.ચૌહાણ, ભચાઉ પ્રાંત અધિકારી જ્યોતિ ગોહેલ, જિલ્લા શિક્ષણાધિકારી સંજય પરમાર, જિલ્લા યુવા વિકાસ અધિકારી દેવાંશી ગઢવી તેમજ સંબંધિત વિભાગના અધિકારીઓ ઉપસ્થિત રહ્યા હતા.
-------------

Comments