Trending News
સ્થાનિક સમાચાર

લગ્ને લગ્ને કુંવારા માધાપરના આધેડેે છતીસગઢની  શિક્ષિકા સાથે ફેરા ફરી ૩ર લાખનું ફુલેકું ફેરવ્યુું

12 December




ભુજ-કચ્છઉદય : છેલ્લા થોડા સમયથી કચ્છ જિલ્લામાં જુદા જુદા પ્રકારની છેતરપીંડીના અનેક કારસાઓ સામે આવી રહ્યા છે. સસ્તુ સોનુ, નકલી નોટોથી ઠગાઈના બનાવો ઓછા હોય તેમ હવે લગ્ન કરી છેતરપિંડીનો વધુ એક કારસ્તાન સામે આવ્યું છે. ભુજ તાલુકાના સમૃદ્ધ એવા માધાપર ગામના એક ઠગબાજે ચોથા લગ્ન કરી છતીસગઢની એક શિક્ષિકા સાથે ઠગાઈ કરતા પોલીસ ફરિયાદ નોંધાઈ હતી. લગ્ને લગ્ને કુંવારા એવા આ શિકારી વરરાજાને પોલીસે ઝડપી પાડી જેલના હવાલે કર્યો છે. આ અંગેની વિગતો મુજબ છતીસગઢના દુર્ગ જિલ્લાના મોહન નગર પોલીસ સ્ટેશન વિસ્તારમાં આ ચોંકાવનારો કિસ્સો પ્રકાશમાં આવ્યો છે, જ્યાં કચ્છના ૫૪ વર્ષીય ઠગે એક શિક્ષિકા સાથે લગ્ન કર્યા હતા અને તેણી સાથે લાખો રૂપિયાની છેતરપિંડી કરી હતી. આરોપી કચ્છના ભુજ તાલુકાના માધાપરનો બિરેન્કુમાર સોલંકી હોવાનું સામે આવ્યું હતું. અગાઉ ત્રણ લગ્ન કર્યા હોવા છતાં ઓળખ છુપાવીને અને ખોટી માહિતી આપીને તેના ચોથા લગ્ન હતા. પીડિત શિક્ષિકાની ફરિયાદના આધારે, 
પોલીસે આરોપીની ધરપકડ કરી અને આઈપીસી ની કલમ ૮૫ અને ૩૧૮(૪) હેઠળ તેને ન્યાયિક રિમાન્ડ પર જેલમાં મોકલી દીધો. પીડિતાએ જણાવ્યું કે તે ૨૦૧૯ માં કોવિડ-૧૯ રોગચાળા દરમિયાન મેટ્રિમોનિયલ વેબસાઇટ પર આરોપીને મળી હતી. વાતચીત આગળ વધતાં, આરોપીએ પોતાને ગુજરાતના એક અગ્રણી ઉદ્યોગપતિ તરીકે રજૂ કર્યો. પીડિતા તેને મળવા માટે ગુજરાત ગઈ, જ્યાં આરોપીએ તેની સાથે લગ્ન કરવાની ઇચ્છા વ્યક્ત કરી, પરંતુ કોવિડ-૧૯ રોગચાળાને ટાંકીને, લિવ-ઇન રિલેશનશિપનો આગ્રહ રાખ્યો. થોડા સમય પછી, આરોપી પોતે દુર્ગ પાછો ફર્યો, અને બંનેએ લગ્ન કર્યા. જોકે, લગ્ન પછી તે ક્યારેય પીડિતાને ઘરે લઈ ગયો નહીં. તેણે પહેલાથી જ ત્રણ લગ્ન કરી લીધા હતા અને ખોટી જાહેરાતો દ્વારા મહિલાઓને લલચાવવા માટે ખોટી જાહેરાતોનો ઉપયોગ કર્યો હતો. જ્યારે પીડિતાએ જાતે તપાસ કરી ત્યારે તેને જાણવા મળ્યું કે આરોપી ત્રણ વખત લગ્ન કરી ચૂક્યો છે. તે અખબારોમાં અને મેટ્રિમોનિયલ સાઇટ્‌સ પર ખોટી જાહેરાતો આપીને મહિલાઓને લલચાવતો હતો. તેની છેતરપિંડીની સત્યતા સામે આવ્યા પછી, પીડિતાએ મોહન નગર પોલીસ સ્ટેશનમાં ફરિયાદ નોંધાવી હતી. આરોપીએ જુદા જુદા બહાના બનાવી શિક્ષિકા પાસેથી અંદાજીત ૩ર લાખ રૂપિયા પડાવી લીધા હતા. ફરિયાદ નોંધાવતાની સાથે જ, આરોપીએ પોતાની ઓળખ બદલી નાખી અને પોલીસથી બચવા માટે વિવિધ સ્થળોએ છુપાઈ ગયો હતો. મોહન નગર પોલીસ સતત તેના લોકેશન પર નજર રાખી રહી હતી. અંતે, ગુરુવારે, પોલીસે તેની ધરપકડ કરી અને કોર્ટમાં રજૂ કર્યો, જ્યાંથી તેને જેલ મોકલી દેવામાં આવ્યો હતો.


 

Comments

COMMENT / REPLY FROM