નવા ભુજ રેલવે સ્ટેશનના અપગ્રેડેશનનું ૭પ ટકા કાર્ય પૂર્ણ
મુસાફરોને મળશે આધુનિક માળખાગત અને વિશ્વ કક્ષાની સુવિધાઓ : કચ્છના સાંસ્કૃતિકવારસાને પ્રતિબિંબિત કરશે નવું સ્ટેશન ભવન
ભુજ - કચ્છઉદય : પશ્ચિમ રેલવેના અમદાવાદ મંડળ પર અમૃત ભારત સ્ટેશન યોજના હેઠળ નવા ભુજ રેલવે સ્ટેશનના અપગ્રેડેશનનું કાર્ય ઝડપથી ચાલી રહ્યું છે. આ પ્રોજેક્ટનો મંજૂર ખર્ચ આશરે રૂા.૨૦૦ કરોડ છે, જેમાંથી આશરે ૭૫% કાર્ય અત્યાર સુધીમાં પૂર્ણ થઈ ગયું છે. સાથે જ ભુજ સ્ટેશન યાર્ડમાં બે પીટ લાઇન પણ બનાવવામાં આવી રહી છે. નવી પીટ લાઇન બનવાથી કોચિંગ ઓપરેશનોની ક્ષમતા અને દક્ષતામાં વધારો થશે, જેનાથી રેક જાળવણી અને વધુ ટ્રેનોનું સંચાલન શક્ય બનશે.ભુજ - નલિયા મીટર ગેજ સેક્શન (૧૦૧.૪૦ કિમી)ને બ્રોડગેજ લાઈનમાં રૂપાંતરિત કરવામાં આવ્યું છે, જેને ૨૮ ઓક્ટોબર ર૦ર૪ના પ્રધાનમંત્રીજીએ રાષ્ટ્રને સમર્પિત કર્યું હતું. સાથે જ નલિયાથી જખૌ પોર્ટ સુધીની ૨૮.૮૮ કિમીની નવી બ્રોડગેજ લાઇન પર પણ કાર્ય ચાલી રહ્યું છે. આનાથી રાષ્ટ્રીય રેલ નેટવર્ક સાથે કચ્છ જિલ્લાના દૂરના વિસ્તારોને સીમલેસ બ્રોડગેજ કનેક્ટિવિટી મળશે. આ રેલ લાઇનથી પોર્ટ કનેક્ટિવિટીમાં વધારો થશે અને કચ્છ જિલ્લાના પોર્ટ દ્વારા નિકાસ અને આયાતને પ્રોત્સાહન મળશે. આ ક્ષેત્રમાં સિમેન્ટ ઉદ્યોગને પણ નોંધપાત્ર ફાયદો થશે, જેનાથી મીઠું, ખનિજો અને અન્ય કાચા માલના કાર્યક્ષમ પરિવહનને સુવિધા મળશે. ભુજ - નલિયા રેલવે લાઇનને વાયોર સુધી (૨૬.૫૫ કિમી) વધુ લંબાવવાનું કામ પણ પ્રગતિમાં છે. તે પૂર્ણ થયા પછી દેશની સેનાને સરહદી વિસ્તારમાં પહોંચવામાં અને માલસામાનના પરિવહનમાં સુવિધા મળશે.પ્રધાનમંત્રી નરેન્દ્ર મોદીની અધ્યક્ષતામાં કેન્દ્રીય મંત્રીમંડળે ૨૭ ઓગસ્ટ, ૨૦૨૫ના દેશલપર - હાજીપીર - લુણા અને વાયોર - લખપત નવી લાઇન પ્રોજેક્ટ્સને મંજૂરી આપી છે. પ્રસ્તાવિત નવી રેલ લાઇન કચ્છ ક્ષેત્રના દૂરના વિસ્તારોને કનેક્ટિવિટી પૂરી પાડશે. આ ગુજરાતના હાલના રેલવે નેટવર્કમાં ૧૪૫ રૂટ કિમી ઉમેરાશે .જેનો અંદાજિત ખર્ચે રૂા.૨૫૨૬ કરોડ રૂપિયા છે. રાજ્યમાં પ્રવાસનને વેગ આપવા ઉપરાંત, આ નવી રેલ લાઇન મીઠું, સિમેન્ટ, કોલસો, ક્લિંકર અને બેન્ટોનાઇટના પરિવહનને પણ મદદ કરશે. આ પ્રોજેક્ટનું વ્યૂહાત્મક મહત્વ કચ્છના રણને કનેક્ટિવિટી પુરી પાડશે. હડપ્પા સ્થળ ધોળાવીરા, કોટેશ્વર મંદિર, નારાયણ સરોવર અને લખપત કિલ્લા પણ રેલ નેટવર્ક દ્વારા આવરી લેવામાં આવશે, જેમાં ૧૩ નવા રેલવે સ્ટેશનો જોડવામાં આવશે, જેનાથી ૮૬૬ ગામડાઓ અને આશરે ૧૬ લાખની વસ્તીને ફાયદો થશે. આ વિકાસાત્મક પહેલોથી આ ક્ષેત્રમાં રોજગારીની તકોમાં વધારો કરશે, જે સામાજિક અને આર્થિક પ્રગતિને વેગ આપશે.ગાંધીધામ વિસ્તાર પશ્ચિમ રેલવેનો સૌથી વધુ માલવાહક વિસ્તાર છે જ્યાં થી એપ્રિલ ૨૦૨૫ થી ઓક્ટોબર ૨૦૨૫ સુધીમાં ઔદ્યોગિક મીઠું ૧.૭૨૭ મિલિયન મેટ્રિક ટન ખાદ્ય મીઠાનું ૧.૧૧૯ મિલિયન મેટ્રિક ટન અને કન્ટેનર નું ૧૦.૫૮૬ મિલિયન મેટ્રિક ટન લોડ કરવામાં આવ્યું. જે એક નોંધપાત્ર સિદ્ધિ છે.નવા ભુજ સ્ટેશનના આ પરિવર્તનથી માત્ર રેલ મુસાફરો જ નહીં પરંતુ સ્થાનિક નાગરિકો અને પ્રવાસીઓને પણ ફાયદો થશે. ભુજ સ્ટેશનને આગામી ૪૦થી ૫૦ વર્ષો સુધીની કચ્છ ક્ષેત્રની મુસાફરી જરૂરિયાતોને ધ્યાનમાં રાખીને પુનઃવિકાસ કરવામાં આવી રહ્યો છે. જેમાં મુખ્ય સ્ટેશન ભવન આશરે ૧.૩૭ લાખ ચો.ફુટ વિસ્તારમાં તથા દ્વિતીય પ્રવેશ ભવન ૧૧,૬૦૦ ચો.ફુટ વિસ્તારમાં બનાવવામાં આવી રહ્યું છે, જેથી મુસાફરોની અવરજવર અને સુગમતા વધશે. આધુનિક વેઇટિંગ એરિયા૮,૦૦૦ ચો.ફુટ વિસ્તારમાં ૪૫૦ થી વધુ મુસાફરો માટે બેઠક વ્યવસ્થા રહેશે, જેથી રાહ જોતી વખતે આરામદાયક રહેશે. મુસાફરોની અવરજવર સુવિધાજનક બનાવશે અને ભીડ સંચાલનમાં સહાયરૂપ બનશે. સ્ટેશન પર ૩ ફૂટ ઓવરબ્રિજ બનાવવામાં આવી રહ્યા છે, જેમાંથી બે ૬ મીટર પહોળા અને એક ૮ મીટર પહોળો છે. આથી પ્લેટફોર્મ વચ્ચે મુસાફરોની અવરજવર વધુ સુરક્ષિત અને સરળ બનશે.૧.૩૨ લાખ ચો.ફુટ વિસ્તાર સાથે ૧.૨૦ લાખ ચો.ફુટની છતવાળી માળખાકીય સુવિધા પ્લેટફોર્મ દરેક ઋતુમાં મુસાફરોને આરામ આપશે. સૌર ઊર્જા પ્લાન્ટ, વરસાદી પાણી સંચય સિસ્ટમ, ગંદા પાણી શુદ્ધિકરણ પ્લાન્ટ અને ૩૨,૦૦૦ ચો.ફુટથી વધુ હરિત વિસ્તારનો વિકાસ પર્યાવરણ સંરક્ષણમાં મહત્વપૂર્ણ ભૂમિકા ભજવશે. મુસાફરો માટે ૧૩ લિફ્ટ, ૧૦ એસ્કેલેટર, આધુનિક ફાયર ડિટેકશન સિસ્ટમ, ૨૫૦ ટન ક્ષમતા ધરાવતી એચવીએસી સિસ્ટમ, પબ્લિક એડ્રેસ સિસ્ટમ, એક્સેસ કન્ટ્રોલ, આરામ અને કનેક્ટિવિટીનો સમન્વય મળશે. સ્ટેશનના બન્ને બાજુઓ પર ૫૦થી વધુ કાર, ૪૦૦થી વધુ દ્વિચક્રી વાહનો, ૩૦ ઓટો રિક્ષા તથા ૪ ઇલેક્ટ્રિક ચાર્જિંગ સ્ટેશનની સુવિધા કરવામાં આવી રહી છે, જેથી મુસાફરો અને સ્થાનિક નાગરિકોને ઉત્તમ પાર્કિંગ અનુભવ મળશે. હરિત ભવન પ્રમાણપત્ર મેળવવાનું લક્ષ્ય રાખવામાં આવ્યું છે અને પરિસરમાં વૃક્ષારોપણ તથા છોડારોપણ દ્વારા સ્વચ્છ અને હરિત વાતાવરણ સુનિશ્ચિત કરવામાં આવશે. નવા સ્ટેશન ભવનનું કાર્ય એપ્રિલ ૨૦૨૬ સુધી પૂર્ણ થઈ જશે તેવું યાદીમાં જણાવ્યું છે.

Comments