Trending News
સ્થાનિક સમાચાર

કચ્છના ટેન્કરમાંથી ગેસની ચોરી કરવાનું કૌભાંડ લીંબડી હાઈવે પર પકડાયું

29 September



ગેસ ભરેલું ટેન્કર, છોટા હાથી, ગેસની બોટલો મળીને ૨૬ લાખનો મુદ્દામાલ જપ્ત

સુરેન્દ્રનગર : લીંબડી તાલુકાના જાખણ ગામના પાટિયા પાસે આવેલી હોટલમાં ટેન્કરમાંથી એલપીજી ગેસ ચોરી કરતા બે શખ્સ ઝડપાયા હતા, જ્યારે એક શખ્સ નાસી છુટયો હતો.  પોલીસે ગેસ ભરેલું કચ્છ પાસીંગનું ટેન્કર, છોટા હાથી ટેમ્પો, ગેસની બોટલો મળીને ૨૬ લાખનો મુદ્દામાલ જપ્ત કરી ત્રણ શખ્સ સામે ગુનો નોંધ્યો છે. આ અંગેની વિગતો મુજબ લીંબડી-અમદાવાદ હાઈવે પર જાખણ ગામના પાટિયા પાસે આવેલી દેવનારાયણ હોટલના કમ્પાઉન્ડમાં અમુક શખ્સો કચ્છ પાસીંગના ગેસના ટેન્કર નંબર જી.જે.૧ર બીવી ૩૪૪પ માંથી ગેસની ચોરી કરીને ગેસના બાટલા ભરી રહ્યા છે. તેવી બાતમીના આધારે લીંબડી પોલીસે બાતમી વાળી જગ્યાએ તપાસ હાથ ધરીને ગેસ ચોરી કરતાં દશરથ રાધુભાઈ પાડલીયા (રહે.ઉટડી) અને પ્રવિણ રમાશંકર પાંડેય (રહે.વડોદરા)ને ઝડપી પાડયા હતાં.  પોલીસે બંને શખ્સો પાસેથી રોકડ રૂ.૧૪ હજાર, બે મોબાઈલ કિં.રૂ. ૮ હજાર, એક છોટા હાથી કિં.રૂ. ૨ લાખ, ટેન્કર ટ્રકમાં ભરેલ ગેસ કિં.રૂ. ૮,૬૬,૨૦૪ તથા એક ટેન્કર કિં.રૂ. ૧૫ લાખ તથા ખાલી અને ભરેલી ગેસની ૧૪ બોટલ કિં.રૂ ૧૦,૪૦૦, એક ઈલેક્ટ્રીક મોટર કિં.રૂ.૨,૦૦૦, ગેસ કાઢવાની નોજલ કિં.રૂ. ૩ હજાર મળીને કુલ રૂ.૨૬,૦૩,૬૦૪નો મુદામાલ પોલીસે કબજે કર્યો હતો. જ્યારે રેડ દરમિયાન વિજય મનુભાઈ પાડલીયા (રહે.લીંબડી) નાસી છુટયો હતો. પોલીસે આ બનાવ અંગેનો ત્રણેય શખ્સો વિરૂદ્ધ લીંબડી પોલીસ સ્ટેશનમાં ગુનો નોંધીને તપાસ હાથ ધરી છે.

Comments

COMMENT / REPLY FROM