૧પ કરોડના ખર્ચે તૈયાર થનાર મેજર બ્રિજ દિવાળી ટાંકણે ખૂલ્લું મૂકાશે
આખરે મથલ મેજર બ્રિજની કામગીરીએ ગતિ પકડી
માર્ગ અને મકાન વિભાગ ‘કચ્છ ઉદય’ના અહેવાલ બાદ હરકતમાં આવ્યું : નખત્રાણા બસ સ્ટેન્ડથી લઈ છેક કોટેશ્વર સુધી રાજ્ય ધોરીમાર્ગમાં પેચવર્કની કામગીરી યુદ્ધના ધોરણે શરૂ
નખત્રાણા : દર ચોમાસામાં વાહન ચાલકો માટે મુશ્કેલીરૂપ મથલ મેજર બ્રિજની કામગીરી અને ઢીલી નીતિ અંગે કચ્છ ઉદયમાં અહેવાલ પ્રગટ થયા બાદ આખરે માર્ગ અને મકાન વિભાગે આ કામ અંગે યુદ્ધના ધોરણે કામગીરી આરંભતા વાહન ચાલકોમાં ખુશીની લહેર છવાઈ છે.
કચ્છ ઉદયમાં આ અંગે માર્ગ અને મકાન વિભાગના ના.કા.ઈ. બી.ડી. પ્રજાપતિ સાથે મેજર બ્રિજની કામગીરી અંગે પૂછતા ચેતન બારડ અને શંભુભાઈ વરચંદે માહિતી આપી હતી કે, આ મેજર બ્રિજ ૧પ કરોડના ખર્ચે આકાર પામી રહ્યો છે અને અગાઉ ડેમના પાણીના ભરાવાના લીધે ૬ માસ કમાગીરી બંધ રહી હતી. ત્યારબાદ ધારાસભ્ય પી.એમ. જાડેજાએ રસ્તા - પુલ બાબતે અંગત રસ લેતા ગાંધીનગર સુધી વજનદાર રજૂઆત કરતા આખરે ઉચ્ચકક્ષાએથી કામગીરીના યુદ્ધના ધોરણે આદેશ છૂટતા મજૂરો દ્વારા કામગીરીએ ગતિ પકડી છે. ગર્ડરની કામગીરી પૂર્ણતા ભણી છે. હવે સ્લેબ - એપ્રોચની કામગીરીનું કામ જોશભેર ચાલુ છે. આ કામ સત્વરે પૂર્ણ થતાં દિવાળી આસપાસ આ મેજર બ્રિજ વાહન ચાલકો માટે ખૂલ્લું મૂકાશે. બીજી તરફ નખત્રાણા બસ સ્ટેન્ડ પછીના રસ્તા જે માર્ગ - મકાન વિભાગમાં આવે છે તે રસ્તામાં ભારે વરસાદથી જ્યાં ખાડા પડ્યા છે અથવા ઉખડી યા છે તે તમામ રસ્તાના કામને પ્રાથમિકતા આપવામાં આવી છે.

Comments