અદાણી પોર્ટ્સ પર ટ્રમ્પના ટેરીફની અસર નહીંવત રહેશે
એચએસબીસીએ અદાણી પોર્ટ્સ પર ‘બાય’નું રેટિંગ જાળવી રાખ્યું
અમદાવાદ : દુનિયાભરમાં અમેરિકન પ્રેસિડન્ટ ડોનાલ્ડ ટ્રમ્પે લાદેલા ટેરિફની અસર વરતાઈ રહી રહી છે. જોકે અદાણી ગ્રુપની કંપની અદાણી પોર્ટ્સ એન્ડ સ્પેશિયલ ઇકોનોમિક ઝોન લિમિટેડના ભારત કાર્ગો વોલ્યુમ પર ટ્રમ્પની નીતિઓની ખૂબ જ ન્યૂનતમ અસર પડશે. વધુમાં એપીસેઝ લોજિસ્ટિક્સ વ્યવસાય માટે તેના અપસ્ટ્રીમ અને ડાઉનસ્ટ્રીમ બંને પ્રકારના નાના એમ એન્ડ એ હાથ ધરશે.
તાજેતરમાં યોજાયેલી એચએસબીસી ગ્લોબલ ઇન્વેસ્ટમેન્ટ સમિટમાં મેનેજમેન્ટે વિશ્લેષકોને જણાવ્યું હતું કે, અમેરિકા જતો કાર્ગો ભારતના વેપારનો માત્ર એક નાનો હિસ્સો ધરાવે છે, તેથી ટેરિફ હિટ ઓછી રહેશે. વિશ્લેષકોના મતે જો ટેરિફને કારણે ભારતની અમેરિકામાં નિકાસ ઘટશે તો પણ ભારત અન્ય દેશો પાસેથી તેની ભરપાઈ કરી શકે છે. ખાસ કરીને એપીસેઝ માટે તેની અસર વધુ મર્યાદિત રહેશે. રાષ્ટ્રપતિ ટ્રમ્પે ઓટો આયાત પર ૨૫% ટેરિફ લાદવાના આદેશ પર હસ્તાક્ષર કર્યા છે, જે ૨ એપ્રિલથી અમલમાં આવશે. ૨ એપ્રિલના રોજ રેસિપ્રોકલ ટેરિફની વ્યાપક જાહેરાત થવાની અપેક્ષા છે. અમેરિકાનો આ નિર્ણય વેપાર ખાધ ઘટાડવા લેવામાં આવેલું એક પગલું છે. જોકે, બ્લૂમબર્ગના અહેવાલ મુજબ ટ્રમ્પે એવો સંકેત પણ આપ્યો છે કે કેટલાક વ્યવસાયિક ભાગીદારોને ટેરિફમાં છૂટ અથવા ઘટાડો મળી શકે છે.
અદાણી પોર્ટ્સ એક સંકલિત લોજિસ્ટિક્સ સેવાઓ પ્રદાતા બનવાનું લક્ષ્ય રાખે છે. અદાણી ગ્રુપની કંપની આગામી પાંચ વર્ષમાં સ્થાનિક બંદરોમાં રૂ. ૪૫,૦૦૦ - ૫૦,૦૦૦ કરોડ અને લોજિસ્ટિક્સ વ્યવસાયમાં રૂ. ૧૫,૦૦૦ - ૨૦,૦૦૦ કરોડના મૂડીખર્ચની યોજના ધરાવે છે. જેનો અર્થ એ થયો કે દર વર્ષે ૧૨,૦૦૦ - ૧૪,૦૦૦ કરોડ રૂપિયાનો મૂડીખર્ચ થશે. મજબૂત રોકડ સ્થિતિને કારણે અદાણી પોર્ટ્સ તેના આંતરિક રોકડ પ્રવાહમાંથી મૂડીખર્ચ પૂર્ણ કરી શકશે. એચએસબીસીએ અદાણી પોર્ટ્સ પર રૂ. ૧,૬૦૦ ના લક્ષ્ય ભાવ સાથે તેનું ‘બાય’નું રેટિંગ જાળવી રાખ્યું, જે પાછલા બંધ ભાવ કરતા ૩૫% વધુ છે. એપીસેઝ દ્વારા ૨૦૩૦ સુધીમાં ૧ બિલિયન ટન કાર્ગો હેન્ડલ કરવાનો લક્ષ્યાંક રાખવામાં આવ્યો છે. મુખ્યત્વે ડોમેસ્ટિક કાર્ગોમાં ૧૨% ચક્રવૃદ્ધિ વાર્ષિક વૃદ્ધિ થવાની ધારણા છે, જ્યારે દક્ષિણપૂર્વ એશિયા, આફ્રિકા અને મધ્ય પૂર્વ જેવા મુખ્ય બજારોમાં સ્થાનિક ઓપરેટરો સાથે ભાગીદારી દ્વારા આંતરરાષ્ટ્રીય કાર્ગો પણ વૃદ્ધિ પામશે.
-------

Comments