મજબૂત નાણાકીય પરિણામોને પગલે આવક અને એબિટડાના વાર્ષિક અંદાજમાં રૂ. ૧,૦૦૦ કરોડનો વધારો, મૂડીરોકાણનું લક્ષ્ય પણ વધાર્યું

અમદાવાદ - કચ્છ ઉદય : અદાણી પોર્ટ્‌સ એન્ડ સ્પેશિયલ ઇકોનોમિક ઝોન લિમિટેડે નાણાકીય વર્ષ ૨૦૨૭ના બીજા ત્રિમાસિક ગાળામાં નોંધપાત્ર નાણાકીય પ્રદર્શન કર્યું છે. ૩૦ સપ્ટેમ્બર, ૨૦૨૬ના રોજ પૂર્ણ થયેલા ત્રિમાસિક ગાળામાં કંપનીની એકીકૃત આવક વાર્ષિક ધોરણે ૨૪ ટકા વધીને રૂ. ૧૧,૩૪૦ કરોડ થઈ છે, જ્યારે એબિટડા ૨૩ ટકા વધીને રૂ. ૬,૮૦૭ કરોડ નોંધાયો છે. કંપનીના કરવેરા બાદના નફામાં પણ ૧૮ ટકાનો વધારો થતાં તે રૂ. ૩,૬૮૨ કરોડ પર પહોંચ્યો છે.
ચાલુ નાણાકીય વર્ષના પ્રથમ છ મહિનામાં કંપનીની આવક ૨૧ ટકા વધીને રૂ. ૨૨,૧૬૧ કરોડ થઈ છે. આ સમયગાળામાં એબિટડા પણ ૨૧ ટકા વધીને રૂ. ૧૩,૩૪૭ કરોડ નોંધાયો છે, જ્યારે કરવેરા બાદનો નફો ૧૪ ટકા વધીને રૂ. ૭,૩૩૨ કરોડ થયો છે. આ પરિણામો કંપનીના બંદરો, માલસામાન પરિવહન અને દરિયાઈ સેવાઓના વ્યવસાયમાં થયેલી પ્રગતિ દર્શાવે છે. પ્રથમ છ મહિનાના સારા પરિણામોને ધ્યાનમાં રાખીને કંપનીએ નાણાકીય વર્ષ ૨૦૨૭ માટેના આવક અને એબિટડાના અંદાજમાં પ્રત્યેક રૂ. ૧,૦૦૦ કરોડનો વધારો કર્યો છે. હવે આવકનો અંદાજ રૂ. ૪૪,૦૦૦ કરોડથી વધારી રૂ. ૪૬,૦૦૦ કરોડ અને એબિટડાનો અંદાજ રૂ. ૨૬,૦૦૦ કરોડથી વધારી રૂ. ૨૭,૦૦૦ કરોડ કરવામાં આવ્યો છે. સાથે જ મૂડીરોકાણના અંદાજમાં રૂ. ૩,૦૦૦ કરોડનો વધારો કરીને તેને રૂ. ૧૫,૦૦૦ કરોડથી રૂ. ૧૭,૦૦૦ કરોડ સુધી લઈ જવામાં આવ્યો છે.
કંપનીના પૂર્ણકાલીન નિયામક અને મુખ્ય કાર્યકારી અધિકારી અશ્વની ગુપ્તાએ જણાવ્યું હતું કે, સ્થાનિક બંદરો કંપનીની કમાણીને મજબૂત બનાવી રહ્યાં છે, જ્યારે આંતરરાષ્ટ્રીય બંદરો, માલસામાન પરિવહન અને દરિયાઈ સેવાઓ વિકાસના મહત્ત્વના આધાર બની રહ્યાં છે. તેમણે રોકડ પ્રવાહના યોગ્ય સંચાલન અને મૂડીરોકાણમાં શિસ્તને કંપનીની પ્રગતિ માટે મહત્ત્વપૂર્ણ ગણાવ્યાં હતાં. છેલ્લા બે વર્ષ દરમિયાન કંપનીએ રૂ. ૩૦,૩૪૬ કરોડનું મૂડીરોકાણ કર્યું છે અને ચોખ્ખા દેવા સામે એબિટડાનો ગુણોત્તર ૧.૮ ગણો જાળવી રાખ્યો છે.
વ્યવસાયના વિવિધ ક્ષેત્રોમાં પણ વૃદ્ધિ નોંધાઈ છે. સમીક્ષા હેઠળના ત્રિમાસિક ગાળામાં સ્થાનિક બંદરોની આવકમાં ૧૩ ટકાનો વધારો થયો છે અને એબિટડા નફાનું પ્રમાણ ૭૨.૫ ટકા રહ્યું છે. આંતરરાષ્ટ્રીય બંદરોની આવકમાં ૭૧ ટકાનો વધારો થયો છે, જ્યારે એબિટડા અગાઉના સમયગાળાની સરખામણીએ ૩.૪ ગણો થયો છે. આ ક્ષેત્રમાં એબિટડા નફાનું પ્રમાણ ૪૭.૭ ટકા નોંધાયું છે. બંદરથી ગ્રાહક સુધીની પરિવહન વ્યવસ્થાના વિસ્તરણને કારણે માલસામાન પરિવહન ક્ષેત્રની આવકમાં ૨૧ ટકાનો વધારો થયો છે. જ્યારે જહાજોના કાફલાના વિસ્તરણ અને દરિયાઈ સેવાઓમાં પ્રવેશને પગલે દરિયાઈ વ્યવસાયની આવકમાં ૫૭ ટકાની વૃદ્ધિ નોંધાઈ છે. કંપનીએ નાણાકીય વર્ષ ૨૦૩૧ સુધીમાં રૂ. ૯૧,૫૦૦ કરોડની આવક અને રૂ. ૫૨,૦૦૦ કરોડના એબિટડાનું લક્ષ્ય નિર્ધારિત કર્યું છે. આ લક્ષ્યાંકો હાંસલ કરવા માટે વિવિધ વિકાસલક્ષી યોજનાઓમાં મૂડીરોકાણને વેગ આપવામાં આવી રહ્યો છે. 
--------