એડવોકેટ મગન રાજીયા ગઢવી પરિવાર આયોજિત પદયાત્રી સેવા કેમ્પનું પૂર્વ રાજ્યમંત્રી વાસણભાઈ આહીરે કર્યું ઉદ્ઘાટન : ૭ થી ૯ ઓક્ટોબર સુધી ત્રણ દિવસ કાર્યરત રહેશે

ભુજ - કચ્છઉદય : નવરાત્રીના પાવન અને મંગલમય પર્વ નિમિત્તે કચ્છની આરાધ્ય દેવી માં આશાપુરાના દર્શનાર્થે દેશ અને વિદેશમાંથી લાખો શ્રદ્ધાળુઓ પદયાત્રા કરીને માતંગ ધામ માતાના મઢ તરફ ભક્તિભાવપૂર્વક આગળ વધી રહ્યા છે. આ મહાપર્વ પ્રસંગે દૂર દૂરથી પગપાળા આવી રહેલા પદયાત્રીઓની નિઃસ્વાર્થ સેવા અર્થે વિભિન્ન સ્થળોએ સેવા કેમ્પો ધમધમી રહ્યા છે. આ જ શ્રદ્ધા ત્રિવેણી સંગમ સાથે કચ્છના પૂર્વ રાજ્યમંત્રી વાસણભાઈ આહીરે વિવિધ સેવા કેમ્પોનો શુભારંભ કરાવ્યો હતો. 
આ સેવા યજ્ઞ અંતર્ગત એડવોકેટ મગનભાઈ ગઢવી પરિવાર દ્વારા આયોજિત માતાના મઢ આઈ આશાપુરા માં પદયાત્રી સેવા કેમ્પ આજથી વિધિવત રીતે પ્રારંભ થયો છે. આ વિશેષ કેમ્પ તારીખ ૭ ઓક્ટોબરથી તારીખ ૯ ઓક્ટોબર સુધી એમ કુલ ત્રણ દિવસ માટે કાર્યરત રહેશે, જેમાં પદયાત્રીઓ માટે વિવિધ પ્રકારની ઉત્કૃષ્ટ સેવાઓ ઉપલબ્ધ કરાવવામાં આવશે. મગનભાઈ રાજીયા પરિવાર અને મગનભાઈ ગઢવી દ્વારા આયોજિત આ કેમ્પ સતત ચોથા વર્ષે સફળતાપૂર્વક ચલાવવામાં આવી રહ્યો છે.  વાસણભાઈ આહીરે જણાવ્યું હતું કે, આ કેમ્પમાં એકલા હાથે પદયાત્રીઓ માટે રહેવાની, જમવાની, સ્નાન કરવાની તથા તબીબી ઉપચાર સહિતની તમામ જરૂરી સુવિધાઓ પૂરી પાડવામાં આવે છે. વાસણભાઈ આહીરે આ નિઃસ્વાર્થ ભાવે કરાતી સેવા બદલ આયોજકોને હૃદયપૂર્વક અભિનંદન પાઠવ્યા હતા.  તેમણે જણાવ્યું હતું કે દર વર્ષની પરંપરા મુજબ આ વર્ષે પણ નોરતાની શરૂઆતથી જ યાત્રાળુઓનો મોટો પ્રવાહ કચ્છની પવિત્ર ધરતી પર આવી પહોંચ્યો છે. ગઈકાલે ચાર જેટલા કેમ્પોનો પ્રારંભ કરાવ્યા બાદ આજે સવારે પણ અન્ય કેમ્પોનું ઉદ્ઘાટન કરવામાં આવ્યું છે. આ ધાર્મિક યાત્રામાં મુંબઈથી છેલ્લા ૨૭ વર્ષથી સતત પદયાત્રા કરતા ૧૧૧ સાયકલ વીરો પણ જોડાયા છે, જે કચ્છ પ્રત્યેની અપાર શ્રદ્ધા દર્શાવે છે. 
નોંધનીય છે કે, આ વર્ષે વડાપ્રધાન નરેન્દ્રભાઈ મોદીના જન્મદિન નિમિત્તે સેવા સપ્તાહ અંતર્ગત વર્ષભર વિવિધ સેવાકીય કાર્યો કરવાનો દ્રઢ સંકલ્પ લેવામાં આવ્યો છે. નરેન્દ્ર મોદી વિચાર મંચના પ્રદેશ અને જિલ્લાના આગેવાનો આ સેવા કેમ્પના માધ્યમથી પોતાના જીવનમાં સેવાભાવ અમલમાં મૂકીને વડાપ્રધાન મોદીને શુભેચ્છા પાઠવી રહ્યા છે. 
--------