ભેજાબોજોથી સાવધાનઃ વડોદરામાં બેન્ક મેનેજર સાથે ૨૫ લાખની છેતરપિંડી

(જી.એન.એસ.)વડોદરા,નિઝામપુરા વિસ્તારમાં આવેલી ઉમા કો.ઓપરેટિવ બેંકના નામે ખોટો ઈમેઈલ કરી બેંકના કરંટ એકાઉન્ટમાંથી રૂપિયા ૨૫ લાખ અન્ય ખાતામાં ટ્રાન્સફર કરાવી અજાણ્યા ભેજાબાજે ઓનલાઇન છેતરપિંડી આચરી હતી. બનાવ સંદર્ભે બેંક મેનેજરે પોલીસ ફરિયાદ નોંધાવતા પોલીસે છેતરપિંડી સહિતની કલમો હેઠળ ગુનો નોંધી કાયદેસરની કાર્યવાહી હાથ ધરી છે.વડોદરાના નિઝામપુરા વિસ્તારમાં આવેલી ઉમા કો.ઓપરેટિવ બેંક લિમિટેડમાં જનરલ મેનેજર તરીકે ફરજ બજાવતા શશીકાંત શિર્કેએ નોંધાવેલી પોલીસ ફરિયાદમાં જણાવ્યું હતું કે, રેસકોર્સ ખાતે આવેલી આઇડીબીઆઈ બેંકની શાખામાં તેમની બેંકનું કરંટ એકાઉન્ટ છે. જેનો ઉપયોગ ફક્ત પોતાના નામે વિવિધ બેંક ખાતામાં અથવા અલગ-અલગ મ્યુચ્યુઅલ ફંડ ખાતામાં નાણાં ટ્રાન્સફર કરવા માટે કરે છે. બેંક ખાતામાંથી નાણાં ટ્રાન્સફર કરવા માટે તેમની બેંકના લેટરપેડ ઉપર ટાઇપ કરેલ પત્રમાં અધિકારીઓની સહી કર્યા બાદ તેને સ્કેન કરી આઈડીબીઆઈ બેંકના મેઈલ આઇડી ઉપર મોકલવામાં આવે છે. ત્યારબાદ ખરાઇ કરીને એકાઉન્ટમાં નાણાં ટ્રાન્સફર થાય છે.વર્ષ ૨૦૧૮ દરમિયાન ૨૮મી જૂનના રોજ આઈડીબીઆઈ બેંકના કર્મચારીએ જણાવ્યું હતું કે, ૨૫ લાખ રૂપિયા થર્ડ પાર્ટી રેમિટન્સ માટે ઉમા બેંક તરફથી મેઈલ મળ્યો હતો. જેથી ૨૫ લાખ રૂપિયા દિલ્હી ખાતે આવેલી આઇસીઆઇસીઆઇ બેંકના પૂજા એન્ટરપ્રાઇઝ ખાતામાં ટ્રાન્સફર કરી આપ્યા હતા. જે મેઈલની ચકાસણી કરતા પ્રાથમિક દ્રષ્ટિએ બેંક સ્ટાફની સંડોવણી જણાતી નથી. ફરિયાદના આધારે પોલીસે છેતરપિંડીનો ગુનો નોંધી ભેજાબાજની શોધખોળ હાથ ધરી છે.