પ્રાગમલજી ત્રીજાની યાદો હંમેશા કચ્છીઓના હૃદયમાં અંકિત રહેશે

વિવિધ સંસ્થાઓ અને આગેવાનોએ આપી ભાવાંજલિ

ભુજ : કચ્છના મહારાવ પ્રાગમલજી ત્રીજા ભલે આપણી વચ્ચે નથી, પરંતુ તેમની યાદો હંમેશા કચ્છીઓના હૃદયમાં અંકિત રહેશે. મહારાવની અણધારી વિદાયથી જિલ્લાની વિવિધ સંસ્થાઓ અને આગેવાનોએ તેઓને ભાવાંજલિ અર્પણ કરી હતી. કચ્છી રાજ્યમંત્રી વાસણભાઈ આહિરે શ્રદ્ધાંજલિ અર્પણ કરતા જણાવ્યું હતું કે, કચ્છના હિત માટે સદૈવ ચિંતિત નામદાર મહારાવ પ્રાગમલજી- ત્રીજાના દુઃખદ અવસાનથી શોકમગ્ન છું.  પરમ કૃપાળુ પરમાત્મા એમના દિવ્ય આત્માને ચિર શાંતિ અર્પે અને પરિવારને આ દુઃખ સહન કરવાની શક્તિ બક્ષે એ જ પ્રભુ ચરણોમાં પ્રાર્થના એમ કહી તેમણે શોકની લાગણી વ્યક્ત કરી હતી.

કચ્છ જિલ્લા ભાજપ પ્રમુખ કેશુભાઈ પટેલે કહ્યું કે, કચ્છે કચ્છની ચિંતા કરતા મહાપુરૂષને ગુમાવ્યા છે. તેમની સાહજીકતા અને નિરાભિમાનીપણું કચ્છની રૈયતને આકર્ષતું હતું. તેમના નિધનથી એક યુગનો અંત આવ્યો છે. કચ્છ જિલ્લા ભાજપ પરિવાર પણ તેમની વિદાયથી કચ્છવાસીઓની સાથે સ્તબ્ધ અને નિઃશબ્દ છે. જિલ્લા ભાજપના મહામંત્રી અનિરૂદ્ધ દવે, વલમજી હુંબલ, શૈલેન્દ્રસિંહ જાડેજા સહિતના હોદ્દેેદારોએ પણ શ્રદ્ધાંજલિ આપી હોવાનું સાત્વિકદાન ગઢવીની યાદીમાં જણાવાયું છે.

કચ્છ જિલ્લા કોંગ્રેસ પ્રમુખ યજુવેન્દ્રસિંહ જાડેજાએ જણાવ્યું હતું કે, મહારાવના નિધનથી કચ્છ અને રાજવી પરિવારે સાચા હમદર્દ ગુમાવ્યા છે. તેઓની આત્માને શાંતિ મળે તેવી પ્રાર્થના કરી હતી. કોંગ્રેસના આગેવાનો વી.કે. હુંબલ, આદમ ચાકી, લખીબેન ડાંગર, રાજેન્દ્રસિંહ જાડેજા, શૈલેન્દ્રસિંહ જાડેજા, સંતોકબેન આરેઠિયા, સામજીભાઈ આહિર, ગની કુંભાર, મુસ્તાક હિંગોરજા, અંજલિ ગોર, ધીરજ રૂપાણીએ શ્રદ્ધાંજલિ પાઠવી હોવાનું દિપક ડાંગરે કહ્યું હતું.

પ્રદેશ કોંગ્રેસના મંત્રી અને માધાપર નવાવાસના ઉપસરપંચ અરજણ ભુડિયાએ જણાવ્યું હતું કે, અલગ કચ્છના હિમાયતી અને લાખો કચ્છીઓના હૃદયમાં સ્થાન અંકિત કરનારા મહારાવ સાહેબની ખોટ ક્યારેય પણ પૂરી શકાશે નહીં. ગુજરાત પ્રદેશ કોંગ્રેસના માજી મંત્રી હાજી જુમા રાયમાએ કહ્યું હતું કે, જનપ્રિય મહારાવ સાથેની મુલાકાતોની યાદો ચિરંજીવી બની રહેશે. અલગ કચ્છની માંગ કરનાર અને કચ્છનું હિત જેને હૈયે હતું તેવા રા’બાવાને શ્રદ્ધાસુમન અપ્ર્યા હતા.

સત્યમ સંસ્થા, તાનારીરી મહિલા મંડળ, કચ્છ જિલ્લા મજદુર વિકાસ મંચ, લોકસેવા  સાર્વજનિક ટ્રસ્ટ દ્વારા પણ શ્રદ્ધાંજલિ અપાઈ હતી. મહારાવ સાહેબ સત્યમ સંસ્થાને સહયોગ આપતા હતા. તાજેતરમાં તેમના જન્મ દિવસે સત્યમ સંસ્થાએ વિવિધ સેવાકીય કાર્યો કર્યા હતા. સંસ્થાના દર્શક અંતાણી, નયનભાઈ શુક્લા, હેમેન્દ્ર જણસારી, જટુભાઈ ડુડિયા, મધુભાઈ ત્રિપાઠી, નર્મદાબેન ગામોટ, ધીરેનભાઈ ઠક્કર, યોગેશ મહેતા, શિરીષભાઈ અંતાણી, વિનોદભાઈ જાેબનપુત્રા, તેજપાલ લાંબા વગેરેએ શ્રદ્ધાંજલિ આપી હતી.

એઆઈએમઆઈએમના કચ્છ જિલ્લા પ્રમુખ સકીલ સમાએ કહ્યું કે, પ્રાગમલજી ત્રીજા કોમી એકતા અને કચ્છના ખમીરના હિમાયતી હતા. કંડલા પોર્ટનું નામ બદલવાની જાહેરાત થઈ ત્યારે તેમણે કંડલા પોર્ટનું નામ મહારાવશ્રી ખેંગારજી પોર્ટ અને માંડવી પોર્ટનું નામ હાજી કાસમ પોર્ટ સૂચવીને કચ્છની સાચી છબી ઉજાગર કરી હતી. કોમી એકતા અને કચ્છી સંસ્કૃતિના રક્ષણ માટે તેઓએ કરેલા પ્રયાસોને કચ્છની પ્રજા હંમેશા યાદ રાખશે.

વાગડ જૈન શ્વેતામ્બર મૂર્તિપૂજક વિશાશ્રીમાળી સાત ચોવીસી સંંમેલનના પ્રમુખ ધીરૂભાઈ મણીલાલ પુંજે કહ્યું કે, કચ્છના ગામે ગામ જૈન મહાજનોમાં રાજાશાહી સમયે કારોબારી તેમજ નગરશેઠની પરંપરા જાળવી માન, મોભો અને આદર આપનાર કચ્છના જાગીરદાર મહારાવ પ્રાગમલજી ત્રીજાની વિદાય આઘાતજનક છે.