તુણા-રામપર કેબલ ચોરીમાં ભુજ-અંજારના ચાર શખ્સો પકડાયા

0
52

કંડલા મરીન પોલીસમાં નોંધાયેલા ગુનાનો એલસીબીએ ભેદ ઉકેલ્યો : એક લાખ રૂપિયાની એલ્યુમિનિયમની પાટો કબજે કરાઈ

ગાંધીધામ : તુણા-રામપર કિડાણા ગામની સીમમાંથી પસાર થતી વિજલાઈનના એલ્યુમિનિયમના વાયરની ચોરીનો ગુનો કંડલા મરીન પોલીસ મથકે નોંધાયો હતો, જે ગુનામાં એલસીબીએ ભુજ, વરનોરા અને અંજારના ચાર શખસોને દબોચી લઈ ગુનાનો ભેદ ઉકેલી નાખ્યો હતો. એલ્યુમિનિયના કેબલોને ગાળીને તેની પાટો બનાવી દેવાઈ હતી જે પણ કબજે કરાઈ હતી.એલસીબીએ જાહેર કરેલી સત્તાવાર વિગતો મુજબ તુણા-રામપર કીડાણા વીજલાઈન એલ્યુમિનિયમના વાયર ચોરી કરી ભુજના ભંગારના વાડામાં વેંચી દેવાયેલા છે જેથી ભંગારના વાડામાં તપાસ કરતા વાયરોને ગાળીને તેની પાટો બનાવી દેવાયેલી હતી. એલસીબીએ અંજાર મફતનગરમાં રહેતા ફકીરમામદ ખમીશા કુંભાર, તો માલ વેંચાવનાર અબુબકર જુસબ ગગડા અને સલીમ સુમાર મેર (રહે. નાના વરનોરા,ભુજ) અને ભંગારના વાડા સંચાલક ફારુક ઈલીયાસ કુંભાર (રહે. અમન નગર,ભુજ)વાળાની ધરપકડ કરી તેમની પાસેથી એલ્યુમિનિયમની પાટો ર૪ નંગ કિંમત ૯૬ હજારનો મુદ્દામાલ કબજે કર્યો હતો.

અધીયા અને ભભકીયાની ટસલમાં કેબલ ચોરીનો ભેદ ઉકેલાયો

પશ્ચિમ કચ્છમાં કેબલ ચોરીનો બનાવ સામે આવે ત્યારે ભંગારના વાડા સંચાલકોના નામ ન ખોલવા માટે પોલીસનો ખાસ માણસ નાના વરનોરાનો ભભકીયો રોલ ભજવતો હતો, બાદમાં ભભકીયો વધારે પૈસા લેતો હોવાથી અધીયો નામનો શખસ પોલીસનો ખાસ માણસ બની ભંગારના વાડા સંચાલકોને બચાવવા પ્રયાસ કરતો હતો. આમ પોલીસના ખાસ માણસો ભભકીયા અને અધીયા વચ્ચે ટસલ થતા કેબલ ચોરીના સેંકડો ભેદ ઉકેલાઈ ગયા છે. કંડલાના બનાવમાં પણ ભંગારના વાડા સંચાલકને પશ્ચિમ કચ્છના માનકુવા પોલીસની ચોરીમાં અગાઉ અધીયાએ બચાવી લેતા ભભકીયાએ કેસ ખોલાવી નાખ્યો હતો.