રાજકોટમાં હોમગાર્ડ જવાન અને સ્થાનિકો વચ્ચે બબાલઃ ચારની ધરપકડ

(જી.એન.એસ.)રાજકોટ,રાજકોટના યુનિવર્સિટી રોડ પર ગઇકાલે રાત્રિના ગંગોત્રી પાર્ક મેઇન રોડ પર હોમગાર્ડ જવાન અને રાત્રિ કર્ફ્યૂનો ભંગ કરનારા સ્થાનિક લોકો વચ્ચે બોલાચાલી થઈ હતી. બાદમાં સ્થાનિકના પરિવારજનો આવી પહોંચતા બન્ને વચ્ચે જામી પડી હતી. તેમાં સામ સામે ગાળા ગાળી કરી હાથાપાય કરવામાં આવી હતી. જોકે આ બાદ હોમગાર્ડ દ્વારા પોલીસને બોલાવી લેવામાં આવી હતી અને પોલીસે આવી ચાર લોકોની ધરપકડ કરી કાયદેસરની કાર્યવાહી હાથ ધરી હતી.રાજકોટના ગંગોત્રી પાર્ક મેઇન રોડ પર હોમગાર્ડ જવાન અને સ્થાનિક લોકો વચ્ચે ઉગ્ર બોલાચાલી અને મારામારીનો વીડીયો સામે આવ્યો છે. જેમાં હકીકત એ મુજબ છે કે ગત રાત્રિના સમયે રાત્રિ કર્ફ્યુનો ભંગ કરી ઘરની બહાર નીકળતા વ્યક્તિને હોમગાર્ડ દ્વારા અટકાવતા તેને પરિવારજનો સાથે મળી હોમગાર્ડ પર હુમલો કરી માર મારવામાં આવ્યો હતો. જોકે આ બાદ દરમિયાન દુર્ગાશકિત ટીમના કોન્સ્ટેબલ આવી જતા તેમણે મારામારી અટકવાઇ ચારેયની અટકાયત કરી હતી.આ અંગે હોમગાર્ડ સૌરવ ડાભીએ ફરિયાદમાં જણાવ્યું હતું કે, મારી નોકરી રાતના દસથી સવારના છ સુધીની હતી. આ સમય દરમિયાન કર્ફયુ હોઇ અને જાહેર જનતાને અવર-જવર કરવા પર પ્રતિબંધ હોઇ રાતે સાડા દસેક વાગ્યે એક શખ્સ બાઇક લઇને નીકળતાં તેને અટકાવી કર્ફયુમાં નીકળવાનું કારણ પુછતાં તે ત્યાંથી ભાગવા માંડ્યો હતો. તેને ઉભા રહેવાનું કહેવા છતાં ઉભો ન રહેતાં અમે પકડવા માટે પાછળ જતાં તે ગંગોત્રી પાર્ક મેઇન રોડ તરફ ભાગ્યો હતો. રસ્તામાં તેણે ફોન કરી પોતાના સગાને પોતે આ રસ્તેથી આવી રહ્યાની અને પોલીસ પાછળ હોવાની જાણ પણ કરી દીધી હશે.દરમિયાન એ શખ્સ શિલ્પન ઓનેક્ષ બીલ્ડીંગ પાસે પહોંચ્યો ત્યાં સુધીમાં તેને પીછો કરી પકડી લીધો હતો અને તેનું નામ પુછતાં તેણે સાગર મનજીભાઇ રાઠોડ જણાવ્યું હતું.