તરસ્યું ગુજરાતઃ મેઘરાજાએ પણ પાળ્યો ડ્રાય સ્ટેટનો કાયદો કે શું?

મેઘરાજાએ પણ કાયદો માની જામ ના છલકાવ્યા! : કચ્છના ૧૦ સહિત ૪૪ તાલુકામાં દુષ્કાળની કપરી સ્થિતિ : હજુ પણ જો આ સ્થિતિ રહી તો સરકાર મુકશે પાણી કાપ

 

ગાંધીનગરઃ ચોમાસાના બે મહિના પૂરા થઈ ગયા છે તેમ છતા હજુ સુધી રાજ્યમાં ક્યાંય પૂરતો વરસાદ નથી થયો કે નજીકના ભવિષ્યમાં વરસસે તેવા કોઈ એંધાણ પણ નથી દેખાતા. ઓછામાં પુરું રાજ્ય તો છોડો પણ ગુજરાતની જીવાદોરી ગણાતા નર્મદા અને ઉકાઈ ડેમના ઉપરવાસ મધ્યપ્રદેશ તેમજ મહારાષ્ટ્રમાં પણ વરસાદ નથી જેના કારણે ડેમમાં પણ પાણી નથી ત્યારે આગામી આખું વર્ષ કઈ રીતે પસાર થશે તેની ચિંતા સરકારને પણ કોરી ખાઈ રહી છે. તેથી જ રાજ્ય સરકાર આ ચિંતા સાથે અત્યારથી જ પબ્લિક વચ્ચે પહોંચી ગઈ છે.
નાયબ મુખ્યમંત્રી નીતિન પટેલે કહ્યું કે, ‘રાજ્યમાં પહેલીવાર આવી કપરી સ્થિતિ આવી છે. ૪૪ તાલુકાઓમાં માત્ર ૧૨પ એમ.એમ. જેટલો જ વરસાદ થયો છે જેથી અત્યારથી જ મોટું જળસંકટ ઉભું થયું છે. તો નર્મદાના ઉપરવાસમાં પણ ખૂબ ઓછો વરસાદ હોવાના કારણે સરદાર સરોવર ડેમમાં પણ પાણીની આવક ઓછી છે.’ ગાંધીનગર ખાતે મંગળવારના રોજ મુખ્યમંત્રી રુપાણીની આગેવાનીમાં ચોમાસા અંગે રીવ્યુ મીટિંગ મળ્યા બાદ નીતિન પટેલે પત્રકાર પરિષદ સંબોધી હતી. આ બેઠકમાં જુદા જુદા વિભાગના પ્રધાનો અને અધિકારીઓ હાજર રહ્યા હતા.
તેમણે વધુમાં કહ્યું કે, ‘આ ખૂબ જ ચિંતાજનક સ્થિતિ છે. આવી સ્થિતિ ઘણા વર્ષો બાદ પહેલીવાર આવી છે. આ બેઠકમાં નક્કી કરવામાં આવ્યું છે કે જે ખેડૂતો ૮ કલાક સુધી વીજ સપ્લાય મેળવતા હતા તેમને હવે ૧૦ કલાક સુધી વીજ પુરવઠો મળશે.’ તેમણે વધુમાં કહ્યું કે, ‘મુખ્યમંત્રી આગામી દિવસોમાં પણ આવી રીવ્યુ મીટિંગ યોજતા રહેશે જેથી સ્થિતિ અંગે તાજી માહિતીના આધારે નિર્ણય લઈ શકાય અને અસરકારક કામકાજ કરી શકાય.’ બેઠક દરમિયાન મુખ્યમંત્રીએ કચ્છની જળસમસ્યાના ઉકેલ માટે ટપ્પર ડેમને ભરવા નર્મદા ડેમમાંથી ૫૦૦ મિલિયન ક્યુબિક ફીટ પાણી તાત્કાલિક ધોરણે છોડવા આદેશ આપ્યો હતો. તેમજ રાજ્યમાં જો ચોમાસું આટલું નબળું જ પસાર થશે તો સરકારે પાણી કાપ મુકવાનું પગલું પણ વિચારી રાખ્યું છે.