અમદાવાદમાં રાહુલ ગાંધી સાથે ‘ધાનેરાવાળી’ ન થાય તે માટે આજે પોલીસનું ખાસ રિહર્સલ

રાહુલ ગાંધીની નજીક નિશ્ચિત આઈ-કાર્ડ વગર કોંગ્રેસીઓ પણ નહીં ફરકી શકે : રાહુલ ગાંધી પણ પ્રોટોકોલ તોડવાનું ટાળે તે જોજો’- કોંગ્રેસના નેતાઓને પોલીસની ‘સલાહ’

 

અમદાવાદ : બનાસકાંઠામાં  પૂરની સ્થિતિ પછી આવેલા કોંગ્રેસના ઉપાધ્યક્ષ રાહુલ ગાંધીની કાર ઉપર ધાનેરામાં  પથ્થર ફેંકવામાં આવ્યો હતો. રાજકીય દ્રષ્ટિકોણથી આ ઘટના રાષ્ટ્રીય બની રહી હતી. ધાનેરા મુલાકાત પછી રાહુલ ગાંધી તા. ૪ને સોમવારે સવારે અમદાવાદ આવી રહ્યાં છે. રાહુલ ગાંધી અમદાવાદના રિવરફ્રન્ટ ઉપર ‘મીની રેલી’ યોજશે તે  પછી શહેરીજનો સાથે ‘સંવાદ’ યોજવાના છે. આ કાર્યક્રમ દરમિયાન રાહુલ ગાંધી સાથે ‘ધાનેરાવાળી’ ન થાય તે માટે  પોલીસને ખાસ સતર્કતા દાખવવા સરકાર તરફથી સૂચના અપાઈ છે. આદેશના પગલે આવતીકાલ, તા. ૩ને બુધવારે શહેર પોલીસની ખાસ રિહર્સલ યોજના છે. પોલીસે પ્રદેશ કોંગ્રેસના આગેવાનો સાથે બેઠક યોજીને એવી ‘સલાહ’ પણ આપી છે કે, ‘રાહુલ ગાંધી પણ પ્રોટોકોલ તોડવાનું ટાળે તે જોજો.’ ખાસ આઈ-કાર્ડ વગર રાહુલ ગાંધીની નજીક કોઈ કોંગ્રેસી પણ ન જઈ શકે તેવી સુરક્ષા વ્યવસ્થા ગોઠવાયાનું પોલીસ સૂત્રોમાંથી જાણવા મળે છે.
અમદાવાદ પોલીસ કમિશનર એ.કે. સિંઘે આજે ઝોન-૧ વિસ્તારના ACP, PI ઉપરાંત
સ્પેશિયલ બ્રાન્ચ, ક્રાઈમ બ્રાન્ચ અને ટ્રાફિક શાખાના ઉચ્ચ અધિકારીઓ ઉપરાંત કોંગ્રેસના આગેવાનો સાથે મિટિંગ યોજી હતી. રાહુલ ગાંધી ધાનેરા આવ્યા ત્યારે પથ્થર ફેંકવાની ઘટનાથી સરકારની અને કાયદો-વ્યવસ્થાની સ્થિતિ અંગે ગુજરાતની બદનામી થઈ હતી. આવી ઘટનાની સંભાવના ન રહે તે માટે શહેર પોલીસના અધિકારીઓ ખાસ આયોજન કરી રહ્યાં છે. તા. ૪ના સવારે ૧૧-૩૦ વાગ્યે રિવરફ્રન્ટ ઈવેન્ટ સેન્ટરમાં કાર્યક્રમ યોજાનાર તે સ્થળથી માંડી એરપોર્ટ અને ત્યાંથી સમગ્ર રૂટ ઉપર ચાંપતો બંદોબસ્ત ગોઠવવામાં આવી રહ્યો છે.ઉચ્ચ સૂત્રોમાંથી પ્રાપ્ય વિગતો મુજબ, આવતીકાલ તા. ૩ને બુધવારે રાહુલ ગાંધીના એરપોર્ટથી ઈવેન્ટ સેન્ટર આગમન સુધીના માર્ગ ઉપર રિહર્સલ યોજવામાં આવશે. રસ્તામાં અને કાર્યક્રમ સ્થળે ક્યાં/ ક્યારે કોણ આવશે/ તે તમામ વિગતો મેળવવામાં આવી છે. સમગ્ર રૂટ ઉપર અને કાર્યક્રમ સ્થળે ક્યાંય પણ ‘ધાનેરાવાળી’ ન થાય તે માટે ચાંપતો બંદોબસ્ત ગોઠવાયો છે. સાથોસાથ, બુલેટપ્રૂફ કારની વ્યવસ્થા પણ કરવામાં આવી છે.આજે ઉચ્ચ પોલીસ અધિકારીઓએ કોંગ્રેસના આગેવાનો સાથે મિટિંગ યોજી હતી. આ મિટિંગમાં રાહુલ ગાંધીની આસપાસ કયા આગેવાનો રહેશે/ કયા આગેવાનો કયા કાર્યક્રમ વખતે ક્યાં રહેશે/ વગેરે વિગતો જાણીને ખાસ પ્રકારના પાસ ઈસ્યૂ કરવામાં આવી રહ્યાં છે. ખાસ પ્રકારના આઈ-કાર્ડ વગરના કોઈપણ કોંગ્રેસીને રાહુલ ગાંધીની નજીકના જીઁય્ સુરક્ષા ઘેરા પાસે ફરકવા નહીં દેવાની સુચનાઓ અપાઈ છે. ધાનેરામાં પથ્થર ફેંકાયાની ઘટના બાદ જીઁય્એ પણ સુરક્ષા વધુ સઘન બનાવી છે. તો, શહેર પોલીસે કોંગ્રેસના આગેવાનોને સલાહ આપી છે કે, ‘રાહુલ ગાંધી પણ કોન્વોય કે પ્રોટોકલ તોડવાનું ટાળે તેની તકેદારી કોંગ્રેસે રાખવાની રહેશે.’